Amerika:Umunyeshuri witwaje intwaro yishwe ari kurasana na Polisi ku ishuri

Amerika:Umunyeshuri witwaje intwaro yishwe ari kurasana na Polisi ku ishuri

Umunyeshuri w’ingimbi yishwe arasiwe mu kigo cy’ishuri cya Austin-East Magnet High School mu mujyi wa Knoxville muri Leta ya Tennessee muri Amerika, nyuma yo kurasana na Polisi.

Uwo munyeshuri yarashwe ku gicamunsi cyo kuri uyu wa Mbere ubwo Polisi yahamagarwaga ikabwirwa ko hari umwana waje ku ishuri yitwaje imbunda. Uwo munyeshuri Polisi yamusanze mu bwiherero bw’ishuri, abonye polisi atangira kubarasaho nayo iramurasa ahita apfa.

CNN yatangaje ko muri uko kurasana, hari umupolisi wakomeretse. Bivugwa ko uwo mupolisi yarashwe mu rukenyerero.

Hashize iminsi ubwicanyi bwifashishije intwaro bufata indi ntera mu ngimbi n’abangavu bo muri Knoxville ndetse hashize iminsi haba imyigaragambyo abaturage basaba ko hajyaho itegeko ribabuza gutunga imbunda.

Tariki 27 Mutarama, umunyeshuri w’imyaka 15 yishwe arashwe na mugenzi we bari mu modoka. Tariki 12 Gashyantare hari undi w’imyaka 16 wishwe arashwe avuye ku ishuri ubwo yari mu modoka. Hatawe muri yombi bagenzi be umwe w’imyaka 14 n’uwa 16 bakekwaho kumwivugana.

Tariki 16 Gashyantare, undi mwana w’imyaka 16 yabonetse hafi y’aho yabaga yishwe arashwe.