Burundi: Kutagira indege itwara Perezida bituma akoresha amafaranga menshi akodesha iz'ibindi bihugu

Burundi: Kutagira indege itwara Perezida bituma akoresha amafaranga menshi akodesha iz'ibindi bihugu
Umuryango urwanya ruswa n’isesagurwa ry’umutungo wa Leta mu Burundi witwa OLUCOME uvuga ko amafaranga Umukuru w’Igihugu, Perezida Evariste Ndayishimiye amaze gukoresha mu ngendo ajya mu mahanga ari menshi.

Umuyobozi w’iri shyirahamwe, Gabriel Rufyiri mu itangazo yashyize hanze, yavuze ko kuba u Burundi budafite indege yajya itwara Perezida Ndayishmiye mu gihe yagiye mu ruzinduko mu mahanga, bituma akoresha amafaranga menshi akodesha indege z’ibindi bihugu.

Ngo ni mu gihe kandi Leta y’u Burundi ivuga ko yaguze indege ebyiri ariko kugeza ubu nta n’imwe Abarundi barabona.

Uyu muryango usaba ko Perezida Ndayishimiye yagabanya inzinduko mu mahanga, akanasobanura aho indege Leta ivuga ko yahuze zaheze.

Perezida Ndayishimiye yagiye ku butegetsi muri Kamena 2020 asimbuye nyakwigendera Pierre Nkurunziza wari umaze imyaka igera kuri itanu atagirira uruzinduko mu mahanga.

Kugeza ubu, Perezida Ndayishimiye amaze gukorera ingendo mu bihugu bigera muri birindwi byo muri Afurika. Ibyo aherutse kugenderera ni Uganda, aho yajyanwe n’indege ya Uganda Airlines na Kenya aho yajyanwe n’indege ya Kenya Airways.

Indege ya Kenya Airways ni yo yamugejeje.muri Kenya

Indege imwe rukumbi yakabaye imujyana mu nzinduko zo mu mahanga ni iyari iya Air Burundi iherutse kugurishwa n’abarimo uwari Minisitiri w’ubucuruzi, Immaculée Ndabaneze wirukanwe ku kazi mu ntangiriro za Gicurasi 2021 azira iri kosa.

like
0
dislike
0
love
1
funny
1
angry
0
sad
0
wow
0