Habanabashaka wari uzwi nka “Big Boss” kubera umubyibuho ukabije wakundaga no kurya yapfuye

Habanabashaka wari uzwi nka “Big Boss” kubera umubyibuho ukabije wakundaga no kurya yapfuye

Habanabashaka Thomas benshi bitaga Big Boss, umuraperi wari umaze kubaka izina kubera ibiganiro yatangaga kuri shene za YouTube, yitabye Imana ku myaka 40 azize indwara y’umutima yari amaranye iminsi. Asize umugore n’abana batatu batuye mu karere ka Rubavu.

Uyu mugabo uretse kuba yari no mu bakunzwe kubera ibiganiro yatangaga, yari yaratangiye no gukina filime y’uruhererekane yitwa ’Big Boss Series’.

Mu cyumweru gishize ubwo yari avuye mu bitaro, yagaragaye mu kiganiro cyatambutse kuri shene ya YouTube avuga ko yari apfuye kuko yari yabuze umwuka kugeza ubwo bamubwira ko niyitsamura ahita apfa.

Murumuna we Biziyaremye Emmanuel yemeje aya makuru, abwira IGIHE dukesha iyi nkuru ko Big Boss yaguye mu Byangabo azize uburwayi yari amaranye igihe.

Ati’’Mukuru wange yitabye Imana yari avuye I Kigali arara ku nshuti i Musanze, aho bita mu Byangabo. Yaje kubura umwuka bitewe n’uburwayi bw’umuvuduko w’amaraso yari asanganywe. Ubu ngiyeyo kureba uko twategura kumushyingura’’.

Big Boss yamenyekaniye mu karere ka Rubavu nk’umuraperi ubyibushye. Mu 2016 nibwo yinjiye mu muziki abifashijwemo n’inzu itunganya umuziki "Talent Record" akora indirimbo zirimo ‘Afurika Yacu Nziza’ na ‘Perereza’ yamenyekaniyeho.

Mu 2018 nibwo yatangiye kumenyekana mu gihugu hose kubera ingano ye n’ukuntu yakundaga gusetsa. Ibi byatumye amashene ya YouTube amuyoboka amuhata ibiganiro byatumye amenyekana.

Uyu mugabo yari mu bakunzwe kuri shene za youtube zo mu Rwanda, hano yari kumwe na Ndimbati