Ibiciro by’ubwishingizi byikubye hafi gatatu, abamotari baratakamba

Ibiciro by’ubwishingizi byikubye hafi gatatu, abamotari baratakamba
Abamotari bakorera mu Rwanda baratakamba nyuma y’aho ibigo bishinzwe ubwishingizi bizamuye ibiciro ku bwishingizi bw’impanuka muri Gicurasi 2021, bikabikuba inshuro hafi eshatu mu buryo bavuga ko budasobanutse.

Aba bamotari bavuga ko moto imwe imaze igihe kiri hagati y’amezi atandatu n’imyaka yishyuzwaga ubwishingizi bw’amafaranga y’u Rwanda (Frw) 61,666 ku mwaka, ubu ikaba isigaye yishyuzwa 166,220 Frw.

Ni mu gihe moto imaze imyaka irenga 10 (ibarwa nk’ishaje), yo yishyuzwa ubwishingizi ku mpanuka bw’amafaranga y’u Rwanda 180,160 Frw.

Abamotari bavuganye na The New Times dukesha iyi nkuru bavuze ko izamuka ry’ibi biciro riteye impungenge kuko badafite ubushobozi bwo kwishyura aya mafaranga, kandi ko ryagira ingaruka ku Banyarwanda benshi muri rusange.

Amakuru iki gitangazamakuru cyakuye muri Radiant Insurance Company, kimwe mu bigo by’ubwishingizi mu Rwanda, yerekana ko cyo cyavanye ibiciro ku 61,666 Frw kuri moto imwe imaze igihe kitarenze imyaka itanu, kibizamura ku 153,280 Frw.

Umuyobozi wungirije wa Radiant, Olivia Kamanzi Tuhairwe yasobanuye ko impamvu iki kigo cyazamuye ibiciro ari uko amafaranga 61,666 Frw yishyuzwaga moto imwe ku mwaka byagaragaye ko ari makeya.

Kamanzi yagize ati: “Iyo dukomeza kwakira ubwishingizi bw’61,666 Frw kuri moto ku mwaka, business y’ubwishingizi yari guhungabana.”

Yasobanuye moto zikunze gukora impanuka, bigatuma ikigo cyabo kiriha amafaranga menshi, nk’aho mu 2020 Radiant yakiriye ubwishingizi bwa miliyari 2.5 Frw ariko yo iriha miliyari 4.7 Frw.

Ati: “Kuri Radiant mu 2020, twakusanyije ubwishingizi bwa moto bwa miliyari 2.5 Frw ariko twarishye arenga miliyari 4.7 mu mpanuka zatewe na moto, haba ku bagenzi bari batwaye cyangwa se izindi modoka.”

Hon. Théogène Munyangeyo uyoboye komite ishinzwe ubukungu n’ubucuruzi mu Nteko Ishinga Amategeko na we yemeje ko izamurwa ry’ibiciro by’ubwishingizi ku mpanuka byatewe n’impanuka za hato na hato abamotari bateza.

Yavuze ko umuti w’iki kibazo ari uko abamotari bakwigishwa, bakajya bitwara neza mu muhanda, impanuka bateza zikagabanyuka. Naho ngo bitagenze bityo, byazagera aho ibigo by’ubwishingizi bihagarika guha moto ubwishingizi, mu rwego rwo kwirinda ibihombo.

like
0
dislike
0
love
0
funny
0
angry
0
sad
0
wow
0