Jill Biden umugore wa perezida wa Amerika yagaburiye abanyamakuru yigize umukozi wo mu ndege

Jill Biden umugore wa perezida wa Amerika yagaburiye abanyamakuru yigize umukozi wo mu ndege

Jill Biden, umufasha wa Perezida Joe Biden wa Leta Zunze Ubumwe za Amerika, yatunguye abanyamakuru n’abandi bakozi be bari bamuherekeje mu kazi i California, yigira umuntu utanga serivisi mu ndege kugeza ubwo yahaye ibyo kurya bamwe mu bakozi be ntawe umurabutswe.

Jill asanzwe agira umuco wo kwizihiza umunsi wo kubeshya, ubaho ku wa 1 Mata buri mwaka, nk’uko byatangajwe n’umugabo we Joe Biden, wavuze ko buri uko uwo munsi ugeze, aba yiteguye kubeshywa ikintu runaka n’umugore we.

Kuri uyu munsi uyu mugore yari avuye mu kazi muri Leta ya California, mu ndege ye ari kumwe n’abanyamakuru ndetse n’abandi bakozi be.

Mu gihe cyo gufata ifunguro, Jill Biden yaragiye yambara imyenda nk’iy’abakozi batanga serivisi zo mu ndege, maze azana ifunguro arigaburira abakozi be n’abanyamakuru kugera abarangije.

Mu gihe abandi bari batangiye gufata ifunguro, Jill Biden yatungutse yambaye nk’uko yari yiriwe yambaye ku buryo abandi bakozi bamumenye, basetswa n’uburyo yababeshye akanabagaburira ntawe ubashije kurabukwa.

I California, Jill yari yasuye amashyirahamwe y’aborozi ndetse na site zitangirwaho inkingo za Covid-19.