Joe Biden: Nyuma yo kunengwa yongereye umubare w'impunzi USA yakira buri mwaka

Joe Biden: Nyuma yo kunengwa yongereye umubare w'impunzi USA yakira buri mwaka

Perezida Joe Biden yisubiyeho ku mubare w'impunzi Leta zunze ubumwe za Amerika zakira buri mwaka, nyuma yo kunengwa n'abo mu ishyaka rye kuko yari yahisemo kugendera ku mubare washyizweho n'ubutegetsi bwa Trump.

Uyu perezida wo mu ishyaka ry'Abademokarate arazamura uwo mubare uve ku 15,000 ujye ku 62,500 nyuma yo kunengwa n'abaharanira uburenganzira n'imiryango yita ku mpunzi.

Biden yavuze ko umubare muto "uterekanaga indangagaciro za Amerika".

Amakuru avuga ko Biden yari afite impungenge zo kwemerera abantu benshi mu gihe bakomeje kwisuka ku mupaka wa Amerika na Mexique.

Umubare mushya wa 62,500 "ukuyeho umubare muto mu mateka" wari washyizweho na Perezida Donald Trump, nk'uko Biden yabivuze kuwa mbere.

Yavuze kandi ko ubutegetsi bwe bushaka kongera uwo mubare w'impunzi Amerika yakira ukagera ku 125,000 mu mwaka utaha.

Gusa avuga "ukuri kubabaje" ko Amerika ishobora kutagera kuri izo ntego uyu mwaka cyangwa utaha, kuko ubutegetsi bwe bukiri mu ngorane zasizwe n'ubwabanje.

Biden yagize ati: "Umubare muto ntiwerekanaga indangagaciro za Amerika nk'igihugu giha ikaze kandi gifasha impunzi."

Hagati y'ukwezi kwa 10/2020 n'ukwa gatatu 2021 Amerika yakiriye impunzi 2,000 nk'uko bivugwa n'ikigo Refugee Processing Center.

Ku butegetsi bwe, Trump yagiye agabanya umubare w'impunzi Amerika yakira, uva ku 110,000 ku mwaka wa nyuma w'ubutegetsi bwa Perezida Barack Obama ugera ku 15,000.

Kuki Biden yazamuye iyo mibare?

Mu kwiyamamaza kwe Biden yari yijeje kuzamura uwo mubare. Ariko mu kwezi kwa kane yatunguye benshi bamushyigikiye avuga ko umubare wa 15,000 "ukwiriye kuko uri igikorwa cy'ubutabazi kandi kiri mu nyungu z'igihugu".

Aho guhindura iyo mibare ahubwo yari yakuyeho amabwiriza abuza kwakira abavuye muri Somalia, Syria na Yemen, anongera imyanya ku bavuye muri Africa, uburasirazuba bwo hagati na Amerika yo hagati.

Biden yahise anegurwa cyane n'imiryango irengera impunzi hamwe n'abantu bo mu ishyaka rye, hashize amasaha White House yahise itangaza ko iriya mibare izavugururwa mu kwezi kwa gatanu.

Alexandria Ocasio-Cortez umwe mu badepite ba Amerika uvuga rikijyana cyane, icyemezo cyo kugabanya umubare w'impunzi zakirwa na Amerika yari yaravuze ko ari igikorwa "cy'ivanguramoko".

Ibiro ntaramakuru Reuters bivuga ko kuwa mbere umukozi wa White House yavuze ko perezida yazamura uwo mubare kugira ngo "atange ubutumwa ko kwakira impunzi ari kimwe mu bintu bikomeye biha Amerika umwanya ifite ku isi".

Imiryango irengera impunzi ku isi, nka International Rescue Committee, yashimye icyemezo gishya cya Biden.

BBC