Karasira yafatanwe arenga miliyoni 30 FRW yaburiye inkomoko yayo, bikekwa ko yayahawe n’abarwanya Leta

Karasira yafatanwe arenga miliyoni 30 FRW yaburiye inkomoko yayo, bikekwa ko yayahawe n’abarwanya Leta
Urwego rw’Igihugu rw’Ubugenzacyaha (RIB) ruvuga ko rwafatanye Karasira Aimable amafaranga y’u Rwanda arenga miliyoni 30 (30,000,000 FRW), ntiyasobanura inkomoko yayo, rwo rukaba ruca amarenga ko yaba yarayahawe n’ababa mu mahanga bamutegeka kuvuga ibyo bashaka.

Umuvugizi wa RIB, Dr Murangira Thierry yabwiye itangazamakuru ati: “Nyuma y’ifungwa rye ryo ku wa 31 Gicurasi n’iperereza ryakozwe, byagaragaye ko Karasira Aimable afite imitungo cyangwa se amafaranga adashobora gusobanura inkomoko yayo.”

Dr Murangira Thierry yabibwiye yasobanuye ko aya mafaranga arimo 10,000 by’amadolari ya Amerika byafatiwe mu rugo rwa Karasira, amayero 520, amafaranga y’u Rwanda 3,142,000, amafaranga y’u Rwanda 11,000,000 yari afite kuri Mobile Money, ngo kandi kuri konti ze yinshi zo kuri banki hariho amafaranga menshi atavuzwe umubare.

Gufatanwa aya mafaranga ntasobanure aho yayakuye, byatumye RIB imukurikiranaho icyaha cyo “kudasobanura inkomoko y’umutungo”, cyiyongereye ku bindi yari afungiwe birimo guhanaka no guha ishingiro jenoside yakorewe Abatutsi mu 1994 no kubiba amacakubiri.

RIB yavuze ko iperereza ry’ibanze yakoze ryerekana ko amafaranga hafi ya yose Karasira afite yayahawe n’abantu baba mu mahanga, bayakusanya, bakayamwoherereza. Muri bo, ngo higanjemo abarwanya Leta y’u Rwanda n’abahakana jenoside yakorewe Abatutsi mu 1994.

Dr Murangira yagize ati: “Tuzi ko aba bantu baba mu mahanga bakusanya amafaranga, bakayaha abantu nka Karasira n’abandi, maze bakasaba kuvuga ibyo bashaka, bagamije guteza imvururu mu Banyarwanda. Aya mafaranga akomoka ku cyaha.”

Karasira Aimable wirukanwe ku mwanya wo kwigisha muri Kaminuza y’u Rwanda, yakoreraga ibiganiro bitavugwaho rumwe ku rubuga rwa YouTube rwe yise Ukuri Mbona, bikaba byaratumye ahamagazwa kenshi n’inzego nka RIB, ndetse ni byo byamufungishije.

Ubwo yari amaze kwirukanwa muri Kaminuza y’u Rwanda muri Kanama 2020 azira ibi biganiro bya YouTube, yasabye “abo hanze” kumushyigikira mu buryo bw’amafaranga, nk’uko bamushyigikira muri ibi biganiro. Ubwo Abanyarwanda baba mu mahanga bamukusanyirije arimo arenga miliyoni 8 FRW yabonetse hifashishijwe urubuga rwa GoFundMe.

Karasira Aimable aracyari mu maboko ya RIB. Irohereza dosiye ye mu Bushinjacyaha kuri uyu wa 7 Kamena 2021 kugira ngo atangire aburanishwe.

like
0
dislike
0
love
0
funny
0
angry
0
sad
0
wow
0