Kwibagirwa aho FPR yakuye u Rwanda ni igicumuro- Hon Bamporiki

Kwibagirwa aho FPR yakuye u Rwanda ni igicumuro- Hon Bamporiki

Umunyamabanga wa Leta muri Minisiteri y’Urubyiruko n’Umuco ushinzwe Umuco, Hon. Bamporiki Edouard avuga ko kuba umuntu yakwirengagiza aho Umuryango wa FPR-Inkotanyi wakuye u Rwanda ubundi bikwiye kuba nk’igicumuro.

Bamporiki watanze ubu butumwa kuri Twitter ye, yibukije Abanyarwanda ko FPR-Inkotanyi yabohoye u Rwanda nyuma y’igihe kinini rwari rumaze rwarabaye imbata y’irondabwoko ryatumye igice kimwe cy’Abanyarwanda gitotezwa.

Umuryango wa FPR-Inkotanyi wabohoye u Rwanda unahagaruka Jenoside yakorewe Abatutsi yatwaye abarenga miliyoni imwe.

Kuva uyu muryango wahagarika Jenoside kandi wahise wimakaza imiyoborere idaheza kandi ishyira imbere ubumwe bw’Abanyarwanda ari na byo byatumye u Rwanda rugera ku rwego rushimishije rugeze uyu munsi.

Muri buriya butumwa yanyujije kuri Twitter, Hon Bamporiki yavuze ko kuba umuntu yakwibagirwa ibyakozwe n’uyu muryango “Ni igicumuro kandi byagucumuza.”

Ubu butumwa bwa Bamporiki, bukomeza bugira buti “Nyuma ya Jenoside Yakorewe Abatutsi mu 1994, nyuma y’uru rugendo rwo kwiyubaka, abakiyobya nimusigeho u Rwanda rwarababaye cyane. Twunge ubumwe, duhuze umurage w’abato.

Hon. Bamporiki ukunze gutanga ubuhamya bw’imiyoborere myiza y’Umuryango wa FPR-Inkotanyi, agaragaza ko ku giti cye uyu muryango wamufashije gukira ibikomere yaterwaga n’ipfunwe ryo kuba akomoka mu muryango w’abagize uruhare muri Jenoside Yakorewe Abatutsi.

Bamporiki usanzwe ari n’Umunyamuryango wa FPR-Inkotanyi, avuga ko u Rwanda rwagize amahirwe adasanzwe yo kugira uyu muryango by’umwihariko bamwe mu bayobozi bawo barimo na Perezida Paul Kagame usanzwe ari na Chairman wawo.

Gusa Bamporiki yigeze kunenga bamwe mu banyamuryango bawo bagenda batatira intego z’uyu muryango kuko hari bamwe muri bo birirwa batega imitego bagenzi babo bari mu nshingano z’igihugu, akavuga ko ibyo bidakwiye muri uyu muryango washinzwe ufite intego zo kubaka u Rwanda ruzira ikibi.