Mexique: Dore hoteli itangaje ikoze mu ngunguru nk’ikimenyetso cy’urukundo bakunda inzoga ya Tequila(AMAFOTO)

Mexique: Dore hoteli itangaje ikoze mu ngunguru nk’ikimenyetso cy’urukundo bakunda inzoga ya Tequila(AMAFOTO)

Mu mujyi wa Tequila muri Mexique hafunguwe hoteli idasanzwe ifite ibyumba byubatse nk’ingunguru, mu rwego rwo kwerekana urukundo ruhebuje bakunda inzoga ya Tequila yahogoje amahanga yengerewa muri ako gace.

Uwaraye muri icyo cyumba cy’agahebuzo cya Matices Hotel de Barricas, aba ameze nk’uwaraye mu ngunguru koko, umuhumuro wa Tequila uba wasabagiye hose dore ko munsi y’ibyo byumba harimo urwengero.

Ubishatse ahabwa n’umwanya akajya mu rwengero kwisogongerera kuri iyo nzoga.

Aka gace Matices Hotel de Barricas iherereyemo buri munsi hengerwa litilo 15 000 za Tequila nkuko ikinyamakuru Metro cyabitangaje.

Muri Matices Hotel de Barricas hari ibyumba 30 byubatse nk’ingunguru ku buryo ubirebeye kure wakeka ko ari mu rwengero kabuhariwe, aho kuba muri hoteli y’agatangaza.

Nyamara nubwo inyuma ari ingunguru, imbere mu byumba ni injyanamuntu. Harimo televiziyo, ibyuma bizana ubuhehere mu nyubako, ubwogero bwiza, utubari. Icyumba cya make muri izo ngunguru gihera ku madolari 140 mu ijoro rimwe.

Munsi y’izo ngunguru harimo urwengero kabuhariwe rwa Tequila ari naho ababishaka bajyanwa gusogongera, bakirebera n’amaso yabo uburyo iyo manyinya yengwa.

Metro itangaza ko muri metero 4.5 z’ubujyakuzimu hariyo na restaurant ifite umwihariko wo guteka ibiryo gakondo by’abanya-Mexique biherekejwe na Tequila.

Iyi hoteli yubatse mu kibaya mu gace kazwiho kuba iwabo wa Tequila
Imbere mu byumba hameze neza
Munsi y'izi ngunguru harimo urwengero kabuhariwe rwa Tequila