Nyaruguru: Umugabo bamukubise ubuhiri mu mutwe bamuziza kwinjira urugo rwa mushiki wabo akahabyara umwana

Nyaruguru: Umugabo bamukubise ubuhiri mu mutwe bamuziza kwinjira urugo rwa mushiki wabo akahabyara umwana
Umugabo witwa Sebagabo Vianney w’imyaka 48, utuye mu mudugudu wa Rasaniro, akagari ka Mariba, umurenge wa Rusenge, akarere ka Nyaruguru yakomerekejwe bikomeye mu mutwe na baramu be bamuziza kwinjira mushiki wabo witwa Eugenie Nyirasangwa akahabyara umwana w’umuhungu.

Sebagabo yagize ati: “Baraje bagota inzu ngo ninsohoke. Byaratinze ngira ngo bagiye ndasohoka. Banyirukaho baramfata, bankubita igihiri mu mutwe n’imigeri. Barambwira ngo nimve muri urwo rugo ntahe iwacu i Nyabimata n’umwana wanjye. Ngo ntibashaka abantu babinjiramo.”

Umuturanyi wabo witwa Siborurema avuga ko Sebagabo asanzwe afitanye amakimbirane na muramu we witwa Musabimana Kazungu, ashingiye ku butaka.

Ngo bararwanye hanyuma uyu Sibagabo akanda ubugabo bwa Kazungu ku buryo yagiye kwivuza ku bitaro by’akarere bya Munini. Umuryango w’uyu Kazungu utera urugo rwa Sebagabo uje kwihorera no kumwirukana mu nzu.

Umunyamabanga Nshingwabikorwa w’akagari ka Mariba, Uwihoreye Alphonsine yemeza ko koko urwo rugomo rwabaye. Yagize ati: “Twagiriye inama Sebagabo yo kujya gutanga ikirego kuri RIB. Nawe ariko yakubise uwitwa Musabimana amukanda ubugabo. Ubu ari kuvurirwa ku bitaro bya Munini.”

like
0
dislike
0
love
0
funny
0
angry
0
sad
1
wow
0