RIB iraburira ba nyiri shene za youtube zirimo Afrimax TV

RIB iraburira ba nyiri shene za youtube zirimo Afrimax TV
Umuvugizi w’Urwego rw’Ubugenzacyaha (RIB), Dr Murangira B. Thierry araburira ba nyiri zimwe muri shene za YouTube zitangaza amakuru, zikanatambutsa ibiganiro bishobora kuyobya rubanda nka Afrimax TV ikunzwe mu Rwanda.

Mu kiganiro yagiriye kuri televiziyo y’igihugu kuri uyu wa 9 Kamena 2021, Dr Murangira yavuze ko n’ubwo ingingo ya 38 y’Itegekonshinga iha buri wese uburenganzira bwo kuvuga cyangwa kugira icyo atangaza yisanzuye, ariko inagaragaza ko hari icyitonderwa.

Dr Murangira yagize ati: “Ingingo ya 38 iravuga iti ‘buri muntu wese afite ubwisanzure bwo gutanga ibiterezo uko abyumva, ndetse akanenga. Ariko ntabwo wemerewe gutanga igitekerezo ku kintu giteza amacakubiri, ikintu gikuraho ituze rusange rya rubanda.” Yavugaga kuri Karasira Aimable watawe muri yombi akurikiranweho ibyaha birimo kubiba amacakubiri yifashishije shene ye.

Yavuze ko muri iki gihe bigaragara ko hari abakoresha nabi imbuga za YouTube, Leta itabakumira ngo ibadode umunwa. Aho ngaho ngo icyo ikora ni ukubamenyesha ko ibyo bakora biganisha ku byaha cyangwa se ari ibyaha, ko kandi hari amategeko yabahana.

Mu bamenyeshejwe ko ibiganiro batambutsa kuri YouTube biganisha ku byaha harimo Karasira. Dr Murangira yavuze ko RIB yabanje kumuburira mbere y’uko imuta muri yombi, ariko arabyanga, “ahitamo gutana”.

Yakomeje avuga ko hari abandi bagiriwe inama kenshi, ariko banga kumva. Muri bo harimo Afrimax TV. Ati: “Hari n’abandi n’ubu ngubu bagiriwe inama kenshi ariko n’ubundi batumva. Ndaguha urundi rugero, hari uwitwa Afrimax, we azwiho cyane gukora content zishuka abaturage bagashora amafaranga yabo mu bintu by’amafuti.”

Dr Murangira yavuze ko Afrimax TV ikorana n’abantu biyise abapfumu, ati: “Abantu noneho bakagenda, ngo bagiye gushakayo ubukire, ngo bagiye gushakayo imbyaro, ngo indwara zananiwe gukira ngo barazivura.”

Umuvugizi wa RIB yaciye amarenga ko aba bakoresha shene za YouTube batumva, nabo bashobora kuzakurikiranwa n’ubutabera nk’uko byagendekeye Karasira Aimable.

like
0
dislike
0
love
0
funny
0
angry
0
sad
0
wow
0