U Buhinde: Abishwe na Coronavirus bamaze kurenga 200.000,baratwikwa ubutitsa

U Buhinde: Abishwe na Coronavirus bamaze kurenga 200.000,baratwikwa ubutitsa

Umubare w’abandura n’abicwa na Coronavirus ukomeje kuzamuka mu Buhinde by’umwihariko muri Leta ya Chhattisgarh iherutse gushyirwa muri gahunda ya guma mu rugo izarangira ku wa 6 Gicurasi 2021.

Imibare yatangajwe na Minisiteri y’Ubuzima muri iki gihugu igaragaza ko kugeza ubu impuzandengo y’abandura Coronavirus ku munsi ari 17.600 mu gihe abo ihitana bageze kuri 246.

Izi nzego zishinzwe ubuzima zatangaje ko kugeza kuri uyu wa Gatatu abari bamaze guhitanwa na Coronavirus ari ibihumbi 200 mu gihe abo yishe mu masaha 24 yashize babaye 3000, ibintu bibaye ku nshuro ya mbere kuva iki cyorezo cyagera muri iki gihugu.

BBC dukesha iyi nkuru yatangaje ko nibura mu cyumweru gishize abanduye Coronavirus bageze ku bihumbi 100 mu Buhinde.

Ubwiyongere bw’ubwandu bushya bwa Coronavirus mu Buhinde burahangayikishije cyane by’umwihariko mu bice by’icyaro aho ibikorwaremezo bifasha mu buvuzi bikiri ikibazo gikomeye.

Ni mu gihe muri iki gihugu hari ikibazo cyo kubura umwuka wongererwa abarwayi barembye.

Muri rusange kuva icyorezo cya Covid-19 cyagera mu Buhinde, abantu 201.187 nibo kimaze gihitana, mu gihe abari bamaze kucyandura kugeza kuri uyu wa kabiri ari miliyoni 18 barimo abagera ku bihumbi 360 bacyanduye mu masaha 24.

Imibiri y'abishwe na Covid-19 iri gutwikwa ubutitsa mu Buhinde