Ubushinjacyaha ntibushaka ko hitabazwa amashusho yerekana ko Dr Kayumba yakoze ibyaha

Ubushinjacyaha ntibushaka ko hitabazwa amashusho yerekana ko Dr Kayumba yakoze ibyaha
Ejo ku wa 10 Kamena 2021, Urukiko Rwisumbuye rwa Nyarugenge rwumvise ubujurire bwa Dr Kayumba Christopher wafunzwe umwaka nyuma yo guhamwa n’ibyaha birimo guteza umutekano muke, yashinjwaga gukorera ku kibuga cy’indege mpuzamahanga cya Kanombe.

Ni urubanza byari byitezwe ko rutangira saa mbiri z’igitondo, ariko rukererwaho amasaha umunani kuko rwatangiye mu masaa kumi y’umugoroba.

Dr Kayumba ahakana ibi byaha byamufungishije umwaka wose, akanabishingiraho asaba ko urukiko rwabimuhanaguraho.

Uyu munyapolitiki yavuze ko atari guteza umutekano muke ku kibuga cy’indege ngo ntahite atabwa muri yombi ako kanya, kuko haba hari abashinzwe umutekano.

Umwunganira mu mategeko, Me Ntirenganya Jean Bosco yasabye ko ubushinjacyaha bwazana amashusho Dr Kayumba yafashwe na ‘camera’ zo ku kibuga cy’indege, kugira ngo agaragaze niba koko uyu munyapolitiki yarakoze ibi byaha.

Dr Kayumba na Me Ntireganya ntabwo bemera ko ubushinjacyaha bwazana abatangabuhamya mu gihe ikibuga cy’indege kigira ‘camera’ zifata amashusho y’ibihabera buri gihe.

Gusa ku rundi ruhande, ubushinjacyaha bwahawe umwanya, buvuga ko amashusho yafashwe na ‘camera’ zo ku kibuga cy’indege atari ngombwa mu gihe hari ababonye Dr Kayumba akora ibyaha, baza mu rukiko bakabimushinja.

Dr Kayumba yatawe muri yombi mu Kuboza 2019, urukiko rwa Kicukiro rumuhamya ibyaha bikorewe ku kibuga cy’indege muri Nyakanga 2020, rumukatira iki gifungo cy’umwaka umwe.

Umucamanza azasoma umwanzuro ku bujurire bw’uyu munyapolitiki tariki ya 8 Nyakanga 2021.

like
0
dislike
0
love
0
funny
0
angry
0
sad
0
wow
0