Umupolisi wahohoteye umusirikare wa Amerika wirabura yirukanwe mu kazi

Umupolisi wahohoteye umusirikare wa Amerika wirabura yirukanwe mu kazi
Nk’uko byatangajwe ku mugaragaro, umwe mu bapolisi babiri bo muri Virginia bashinjwa guhohotera umusirikare wa Leta Zunze Ubumwe za Amerika, S/Lieutenant Caron Nazario banamutunze imbunda zabo ndetse akanamutera ibintu mu maso ubwo bari bamuhagaritse ari mu modoka ye, yirukanwe mu kazi.

Umupolisi Joe Gutierrez yahagaritswe ku mirimo ye nyuma y’iperereza ryemeje ko atakurikije amabwiriza yashyizweho n’ishami rya polisi, mu Mujyi wa Windsor, muri Virginia, nk’uko byatangajwe mu itangazo ryo kuri iki Cyumweru gishize.

Iri tangazo ntiryasobanuye neza ibihano ku bandi bapolisi bagize uruhare mu byabaye nk’uko iyi nkuru dukesha Al Jazeera ikomeza ivuga.

Ryongeyeho ko ibihano ndetse n’ibisabwa mu rwego rw’amahugurwa y’inyongera byatangiye gushyirwa mu bikorwa nyuma y’ibyabaye.

Iyirukanwa ryaje nyuma y’uko Nazario atanze ikirego arega abo bapolisi bombi mu rukiko, impapuro z’urukiko zivuga ko hakoreshejwe urugomo mu guhagarika imodoka ku itariki 05 Ukuboza 2020, aho abapolisi batunze imbunda zabo, bagakubita hasi Nazario, bakamutera urusenda mu maso ndetse “bakamukangisha kumwica ”.

S/Lt Nazario, Umulatino uvanze n’umwirabura, yavuze ko Gutierrez na Crocker bahonyoye uburenganzira bwe ahabwa n’itegeko nshinga, aho mu kirego cye yashyizemo gukubitwa no kumusaka no kumufunga binyuranyije n’amategeko.

Mbere yaho kuri iki Cyumweru, Guverineri wa Virginia, Ralph Northam, yari yatangaje ko yategetse ko Igipolisi cya Virginia gikora iperereza ryigenga kuri iki kibazo.

like
0
dislike
0
love
1
funny
0
angry
0
sad
0
wow
0