Uwabaye Visi Meya wa Rubavu arasaba ubufasha leta nyuma yo gusenyerwa n’imitingito

Uwabaye Visi Meya wa Rubavu arasaba ubufasha leta nyuma yo gusenyerwa n’imitingito
Nsengiyumva Buntu Ezechiel wabaye Umuyobozi w’Akarere ka Rubavu wungirije, ushinzwe iterambere ry’ubukungu kuva mu 2011 kugeza mu 2015, arasaba Leta y’u Rwanda ubufasha nyuma y’aho inzu ye isenywe n’imitingito yakurikiye iruka ry’ikirunga cya Nyiragongo mu kwezi gushize.

Nsengiyumva utuye mu Murenge wa Rubavu mu Karere ka Rubavu aherutse gutangariza Radiyo Ijwi rya Amerika ko muri ibi bihe, Leta iba ikwiye gufasha buri wese wagizweho ingaruka n’ibiza nk’iki, hatitawe ku byiciro by’ubudehe bisanzwe bifatwa nk’igipimo cy’ubushobozi bw’abaturage mu rwego rw’ubukungu.

Yagize ati: “Niba igiye ari nayo wari ufite gusa, hari inzego zishinzwe ibiza n’ubutabazi, abantu bakagombye gutabarwa hatanabayeho kuvuga ngo uyu ari mu cyiciro cya mbere, uyu ari mu cya kabiri, uyu ari mu cya gatatu…Ushobora kuba uri mu cya gatatu bashingiye kuri iyo nzu utuyemo. Ni ukuvuga ngo nk’uwagarura abantu, bakongera gushyira mu byiciro, wahita ujya no mu cya 0, reka mbyite gutyo.”

Yavuze ko na we ari mu bagizweho ingaruka n’iyi mitingito, kuko yamusenyeye inzu yari amaze imyaka 2 yujuje. Ngo Leta ibaye ntacyo imufashije, ntabwo yazongera kubona ubushobozi bwo kubaka indi.

Nsengiyumva w’imyaka 44 y’amavuko yagize ati: “Nari maze imyaka ibiri nyituyemo. Umunyu afite imyaka 44 ukaba ubonye inzu ku myaka 40, atari uko wayanze mu myaka yashize yose…Ndahangayitse, ndababaye, birandenze…”

Yavuze ko mu buzima bwe atari yarubatse indi nzu, ngo yabagaho asembera, aba mu bukode, kugeza ubwo yiyubakiye iye, ku bw’ibyago nayo ikaba yasenywe n’imitingito.

Ibarura ryakozwe ryagaragaje ko inzu zirenga 1800 ari zo zasenywe n’imitingito, harimo izasataguritse, izindi ziremamo ibyobo ku buryo kuzisubiramo byashyira ubuzima mu kaga. Amakuru aturuka i Rubavu avuga ko akarere kakoze isuzuma kugira ngo hamenyekane abagomba gufashwa n’uburyo bafashwamo burimo gusanirwa inzu, kubakirwa bundi bushya cyangwa se kwimurwa.

Mu gihe aba baturage batarahabwa ubufasha burambye, ubuyobozi bw’aka karere bwafashe icyemezo cyo gukodeshereza abatagira aho kuba, mu gihe cy’amezi atatu.

like
0
dislike
0
love
0
funny
0
angry
0
sad
0
wow
0