Burundi: Igitero cy’abitwaje intwaro cyahitanye abantu batandatu

Burundi: Igitero cy’abitwaje intwaro cyahitanye abantu batandatu
Abantu batandatu bo muri Komini Matongo ho mu ntara ya Kayanza mu gihugu cy’u Burundi, bishwe n’umutwe w’abitwaje intwaro utaramenyekana, abaturage bakemeza ko abari bawugize bari bambaye imyambaro ya gisirikare.

Uretse abishwe, hakomeretse abandi bane mu gihe umwe yaburiwe irengero, nk’uko byemejwe n’abayobozi ba Komini Matongo.

Amakuru ya kiriya gitero yemejwe na Alice Nsabiyumva, Burugumesitiri w’iriya Komini.

Abatuye muri kariya gace bashinje abasirikare b’u Burundi kubatererana ntibatabare, ngo kuko abari bacunze umutekano ku kigo nderabuzima cya Nyarumanga bumvise amasasu bagahitamo gukizwa n’amaguru.

Abavuganye n’itangazamakuru ry’i Burundi bavuga ko icyo gitero cyagabwe mu ijoro ryakeye cyari gikomeye, ngo kuko abakigabye bari bitwaje imbunda n’ibisasu bikomeye, harimo icyatewe ku kigo nderabuzima gusa ntikigire byinshi cyangiza.

Ni igitero bivugwa ko cyatangiye mu ma saa kumi n’ebyiri z’umugoroba w’ejo ku wa Kane.

Abaturage bavuze kandi ko amasasu yavuze umwanya munini, bakemeza ko ababagabyeho igitero baje baturuka mu ishyamba rya Kibira rikunze kuba indiri y’imitwe yitwaje intwaro. Abaturage kandi bafite ubwoba bw’umutekano wabo.

Hari amakuru avuga ko ubwo kiriya gitero cyabaga hari abasirikare b’u Burundi bishwe imirambo yabo igahita itwarwa, gusa nta rwego rushinzwe umutekano mu Burundi burayemeza.

Magingo aya muri kiriya gice hamaze koherezwa abasirikare n’abapolisi benshi, kugira ngo babashe kugarura amahoro.

Umuvugizi wa Polisi y’u Burundi, Pierre Nkurikiye, yavuze ko abagabye kiriya gitero bataramenyekana, gusa hakaba hatangiye iperereza kugira ngo hamenyekane abakihishe inyuma.

like
0
dislike
0
love
0
funny
0
angry
0
sad
0
wow
0