Abacuruzi bo mu Rwanda bararira ayo kwarika kubera Coronavirus yibasiye ubushinwa

Abacuruzi bo mu Rwanda bararira ayo kwarika kubera Coronavirus yibasiye ubushinwa

Bumwe mu bucuruzi bwo mu Rwanda bwatangiye kugerwaho n’ingaruka z’icyorezo cya Coronavirus cyadutse mu Bushinwa aho bakuraga bimwe mu bicuruzwa.

Hari abacuruzi batari bake bacuruzaga ibicuruzwa bitandukanye bivuye mu Bushinwa. Muri byo harimo: imyenda, ibikoresho by’ikoranabuhanga n’ibindi.

Kuri ubu bitewe n’uko ingendo z’indege zijya mu Bushinwa zabaye zihagaze hirindwa ko Abanyarwanda bajya mu Bushinwa bakwandura Coranavirus, bumwe mu bucuruzi bwatangiye guhura n’ibibazo.

Umwe mu bacuruzi, Adrie Musabe waranguraga imyenda mu Bushinwa yabwiye The New Times ko ubucuruzi bwe bwahagaze.

Ati " Akazi karahagaze."

Musabe avuga ko yajyaga mu Mujyi wa Guanzhou rimwe mu kwezi agiye mu bucuruzi, gusa ubu ngo ntibikimushobokera. Avuga ko yari aziko azasubira mu Bushinwa muri Gashyantare gusa ntibyakunze.

Ati " Ni ugutegereza nta we uzi uko bimeze. Hari ibyo naranguye ubwo mperukayo, none nibishira mu bubiko nzakora iki?"

Uyu avuga ko atatumiza ibicuruzwa bye atageze mu Bushinwa kuko ngo yigeze kubikora arahomba. Avuga ko bimusaba kwigerera we ubwe mu Bushinwa kugira ngo agure ibicuruzwa yifuza.

Ni ikibazo ahuriyeho na mugenzi we, Elias Mbangura ukorera mu nyubako ya CHIC.

Icyo abacuruzi bahurizaho muri rusange ni uko bashobora kwifashisha ibindi bihugu nka Dubai gusa bagakomwa mu nkokora n’uko bahendwa ugereranyije no mu Bushinwa aho bagura ibikoresho bibahendukiye. Bavuga ko ibi bikwiriye guha isomo Afurika ko ikwiriye kugira inganda zayo.

U Rwanda rwasabye abaturage barwo kudakora ingendo zitari ngombwa mu Bushinwa by’umwihariko mu Ntara ya Wuhan aho iki cyorezo cyibasiye bikomeye.

Kuri ubu harabarurwa abantu basaga 1,000 bamaze gupfa bazize indwara ya Coronavirus. Ni mu gihe abagera 40,171 bamaze kuyandura mu gihugu cy’Ubushinwa.