Abakinnyi bahondaguye umusifuzi wabasifuriye nabi

Abakinnyi bahondaguye umusifuzi wabasifuriye nabi
Umusifuzi Lucien Toudignon ukomoka mu gihugu cya Bénin, yakubiswe iz’akabwana n’abakinnyi b’ikipe ya Bouenguidi FC yo muri Gabon bamushinja kubasifurira nabi.

Ku Cyumweru tariki ya 20 ni bwo iyi Bouenguidi FC yari yasuye Saltas yo muri Burkina Faso, mu mukino wo kwishyura w’ijonjora rya nyuma rya CAF Confederation Cup wabereye i Ouagadougou.

Bouenguidi yari yaratsinze igitego 1-0 mu mukino ubanza wari warabereye mu gihugu cya Gabon, gusa itsindwa ibitego 3-1 mu mukino wo kwishyura byatumye isezererwa ku giteranyo cy’ibitego 3-2.

Urubuga Sports Drill rwavuze ko nyuma y’uriya mukino abakinnyi ba Bouenguidi bagabye igitero ku musifuzi wari wayoboye uriya mukino, bakamuhondagura bamushinja kubasifurira nabi kugeza ubwo ajyanwa mu bitaro.

Sports Drill yavuze ko "Umusifuzi w’umunya-Bénin Lucien Toudignon, ejo hashize byemejwe ko ari mu bitaro nyuma yo gusagararirwa akanakubitwa n’abakinnyi ba Bouenguidi FC yo muri Gabon nyuma yo gutsindwa ibitego 3-1 na Saltas yo muri Burkina Faso mu mukino wa kamarampaka wa CAF Confederation Cup."

Amakuru avuga ko nyuma ya ruriya rugomo Ikipe ya Bouenguidi yaciwe amande angana na $15,000 (akabakaba 15,000,000Frw) ndetse inahagarikwa kumara imyaka ibiri ititabira amarushanwa ategurwa n’impuzamashyirahamwe y’umupira w’amaguru muri Afurika (CAF).

like
0
dislike
0
love
0
funny
0
angry
0
sad
1
wow
0