Abantu 690 bahawe igihano cy’urupfu barishwe mu 2018

Raporo y’ Umuryango uharanira uburenganzira bwa muntu (Amnesty International) igaragagaza ko umubare w’abantu bahabwa igihano cy’urupfu ku Isi bakicwa ugenda ugabanuka, aho mu 2018 hishwe 690 mu gihe umwaka wawubanjirije bari 993.

Abantu 690 bahawe igihano cy’urupfu barishwe mu 2018

Raporo y’ Umuryango uharanira uburenganzira bwa muntu (Amnesty International) igaragagaza ko umubare w’abantu bahabwa igihano cy’urupfu ku Isi bakicwa ugenda ugabanuka, aho mu 2018 hishwe 690 mu gihe umwaka wawubanjirije bari 993.

Uyu mubare niwo muto mu myaka 10 ishize, ukaba waragabanutseho 31% ugereranyije na 2017.

Iyi raporo yashyizwe ahabona mu cyumweru gishize, ivuga ko muri Leta Zunze Ubumwe za Amerika n’u Buyapani, umubare w’abicwa barabihanishijwe n’inkiko wiyongereye.

Icyakora Amnesty International ivuga ko iyo raporo itagaragaza imibare y’abantu bicwa mu bihugu bimwe nk’u Bushinwa kuko bikorwa mu ibanga rikomeye ariko ‘Bishoboka ko abicirwayo babarirwa mu bihumbi’.

Umunyamabanga mukuru wa Amnesty International, Kumi Naidoo, avuga ko habayeho igabanuka rya 31% bitewe ahanini n’uko ibihugu bimwe bimaze gusobanukirwa ko guhanisha kwica umuntu atari cyo gisubizo kiboneye, bigatanga icyizere ko icyo gihano kizakomeza kugabanuka ugereranyije n’imyaka ishize.

Iyo raporo kandi isobanura ko iryo gabanuka rigirwamo uruhare n’uko ibihugu bimwe nka Iran byadohoye amategeko yo guhangana n’ikoreshwa ry’ibiyobyabwenge, aha abicwa bagabanutse ku kigero cya 50% ariko ngo hari ibihugu bimwe nka Iraq, Pakistan na Somalia imibare y’abicwa ikiri hejuru.

Uretse u Bushinwa bufatwa nk’uburi ku isonga y’ibihugu bifite umubare munini w’abicwa ariko batazwi, Iran ibarwamo 253, Arabia Soudite 149, Vietnam 85, Iraq 52. Ibi bihugu uko ari bine byihariye nibura 78% by’abishwe mu 2018.

Ibihugu iyi raporo igaragaza ko bifite umubare muto w’abantu bishwe mu 2018 harimo Leta Zunze Ubumwe za Amerika zifite 25, u Buyapani 15, Singapore 13, Sudan y’Epfo barindwi, Belarus bane naho Thailand nta n’umwe wishwe guhera mu 2009.

Ibihugu 20 byatanze igihano cyo kwica abantu birimo Arabia Soudite bicwa bakaswe imitwe, USA bicishwa amashanyarazi, Afghanistan, u Buyapani, Singapore bicwa banyonzwe naho muri Koreya ya Ruguru na Yemen bakaraswa.

Mu 2018 Amnesty International igaragaza ko abantu 2531 aribo bakatiwe igihano cy’urupfu mu gihe mu 2017 bari 2591 ariko nabwo u Bushinwa ntibubarwamo, bigatuma abantu bakatiwe igihano cy’urupfu ku Isi bagera kuri 19 336.

Mu bihugu biza ku isonga mu gutanga igihano cy’urupfu harimo Iraq yagihaye 271, bikubye inshuro enye mu 2018 naho Misiri biyongereye ku kigero cya 75%, bagera kuri 717.

Amnesty International igaragaza ko ibihugu 106, birenga 1/2 byakuyeho igihano cy’urupfu.