Abantu 8 mubarimo gufasha Perezida Trump kwiyamamaza barwaye Covid-19

Abantu 8 mubarimo gufasha Perezida Trump kwiyamamaza barwaye Covid-19

Mu gihe Umukuru w’Igihugu cya Amerika Donald Trump akomeje ibikorwa bye byo kwiyamamariza indi manda, kuri uyu wa mbere Tariki 22 Kamena 2020 hari abandi bantu 2 bo mu itsinda rimufasha muri iki gikorwa bapimwe basanga baranduye Coronavirus. Aba biyongereye ku bandi 6 bayisanzwemo kuwa Gatandatu baba umunani. Uku kwiyamamaza muri ibi bihe kwanenzwe na benshi ko gushobora kongera Covid-19.

Abandi bantu babiri bari mu itsinda/Ekipe ifasha Perezida Donald Trump kwiyamamaza babonywemo ubwandu bwa Virusi ya Corona. Aba baje biyongera ku bandi batandatu bo muri iri tsinda basanganywe ubwo bwandu ku munsi wa gatandatu tariki 20 Kamena 2020.

Tim Murtaugh ushinzwe gutanga amakuru muri iryo tsinda, yemeje iby’ubwo bwandu agira ati: “Ni byo baranduye, ariko ku wa gatandatu aho bari muri leta ya Oklahoma, Trump afungura ibikorwa byo kwiyamamaza kwe bose bari bambaye udupfuka munwa.”

Ijwi rya Amerika dukesha iyi nkuru, ritangaza ko Tim Murtaugh yemeje ko abo bombi bivugwa ko banduye iki cyorezo bamaze gushyirwa mu kato. Ukwiyamamaza kwa Perezida Trump muri bino bihe Amerika ikomeje guhangana n’iki cyorezo cya Coronavirus kwakiriwe nabi n’impande zitandukanye, zivuga ko gushobora gutuma abacyandura biyongera.