Abanyamakuru ba CNN batawe muri yombi bari gukora inkuru ku myigaragambyo

Abanyamakuru ba CNN batawe muri yombi bari gukora inkuru ku myigaragambyo
Itsinda ry’abanyamakuru ba CNN rigizwe na Omar Jimenez n’abagenzi be,batawe muri yombi na Polisi ubwo barimo gukora inkuru yerekana uko imyigaragambyo iri kugenda by’ako kanya mu mujyi wa Minneapolis.

Uyu munyamakuru na bagenzi be nk’uko bigagazwa n’amashusho ya CNN bari bamaze gufata mbere yo gutabwa muri yombi,babanje kwibwira abapolisi ndetse banemera ko aho basabwa guhagarara ari ho bari buhagarare gusa birangira Polisi igiye ibafata umwe kuri umwe.

Ubwo umunyamakuru Jimenez yarari gutangaza uko imyigaragambyo yifashe,humvikana ijwi ry’umupolisi amubwira ati"Tugutaye muri yombi!" Jimenez yabajije impamvu afashwe kandi babibona ko ari abanyamakuru akaba yanubahirije guhagarara aho bamubwiye ariko bakomeza kumubwira ko atawe muri yombi ndetse n’abagenzi be bakomeza kubafata.

Ubwo abapolisi bazaga gufata umunyamakuru ushinzwe gufata amashusho bigaragara kamera ikomeje gufata amashusho y’ifatwa rye n’uburyo bamujyanye ubona abapolisi ntacyo bibabwiye kuba kamera ikiri gufata amashusho.

Iri fatwa ry’aba banyamakuru ryabaye CNN yamaze gutangaza indi nkuru igaragaza uburyo abapolisi baje bakirara mu baturage bigaragambyaga ari na ko babatera ibyuka biryana mu maso mu bushyamirane bwamaze isaha irenga,bamwe mu baturage bateraga Polisi amabuye abandi bagahunga.

Perezida Donald Trump ku rukuta rwe rwa Twitter yanditse anenga umuyobozi w’Umujyi wa Minneapolis ku kuba yananiwe guhosha izo mvururu,aho yise abigaragambya ko ari ’igitero’ agasezeranya kuzana Igisirikare no kurasa abagerageza gusahura no gukomeza kwangiza ibintu.Yagize ati"Ugusahura nigutangira,ako kanya no kurasa biratangira."

Mu rukerera nka saa 4:30 muri Minneapolis,umuriro n’imyotsi myinshi byari bikizamuka ku nyubako ya Polisi kandi abigaragambya bari bacyuzuye mu mihanda y’aho hafi.Uretse inyubako Polisi ya Minneapolis ikoreramo,hanatwitswe inzu z’uburiro ziri iruhande y’iyo nyubako ndetse n’ububiko bw’inzoga za ’liquors’ buri hafi aho.

Abigaragambya barasaba Leta kubaha ubutabera nyuma y’urupfu rw’umwirabura George Floyd wishwe n’abapolisi bane kandi nta ntwaro afite ndetse atanarwanyije inzego z’umutekano.Nyuma yo kwirukanwa mu mirimo bari bashinzwe,abaturage barifuza ko bafatwa bagashyikirizwa ubutabera.

What's Your Reaction?

like
0
dislike
0
love
0
funny
0
angry
0
sad
0
wow
0