Abasirikare 20 b’u Buhinde baguye mu ntambara y’amabuye n’inkoni yabasakiranyije n’ab’u Bushinwa

Abasirikare 20 b’u Buhinde baguye mu ntambara y’amabuye n’inkoni yabasakiranyije n’ab’u Bushinwa
Leta y’u Buhinde yatangaje ko abasirikare 20 bayo bitabye Imana, nyuma y’intambara y’amabuye n’inkoni yabasakiranyije n’ab’u Bushinwa ahitwa Ladakh, agace gaherereye mu karere ka Kashmir ibihugu byombi bimaze igihe bipfa.

Urupfu rwa bariya basirikare b’Abahinde rwaje rukurikira umwuka mubi ukomeje gututumba hagati y’iki gihugu n’Ubushinwa, by’umwihariko mu myaka 45 bikaba ari ubwa mbere ubushyamirane bw’ibihugu byombi buguyemo abasirikare bangana kuriya.

Igisirikare cy’u Buhinde cyari cyabanje gutangaza ko cyatakarije muri buriya bushyamirane abasirikare batatu, gusa kuri uyu wa kabiri Leta yatangaje ko hari abandi bapfuye nyuma yo gukomereka bikomeye.

Leta y’u Bushinwa yo yatangaje ko ku ruhande rwayo abasirikare 43 ari bo bakomerekeye muri iriya ntambara, gusa ntiyatangaza niba muri bo hari abapfuye.

Minisiteri y’ububanyi n’amahanga y’u Buhinde yashinje u Bushinwa kuba bwararenze ku masezerano yabaye mu cyumweru gishize, agamije kubaha umurongo ugabanya ibihugu byombi uri mu kibaya cya Galwan.

Itangazo iyi Minisiteri yasohoye rivuga ko"Uguhangana n’ubushyamirane ku mpande zombi byatewe n’uko uruhande rw’Ubushinwa rwagerageje guhindura sitati" ikubiye muri ayo masezerano yasinywe.

Umuvugizi wa Minisiteri y’Ububanyi n’Amahanga y’u Bushinwa, Zhao Lijian, we yavuze ko ubushyamirane bwahuje ingabo z’igihugu cye bwatewe n’uko ejo ku wa mbere ingabo z’u Buhinde zambutse umurongo zikinjira mu Bushinwa incuro ebyiri zose, ibyo yemeza ko ari ubushotoranyi.

Ingabo z’u Buhinde n’iz’u Bushinwa zaherukaga gushyamirana mu byumweru bishize, mu bushyamirane butagaragayemo amasasu.

Ubwo ibihugu byombi byashwanaga mu minsi yashize, u Buhinde bwashinjaga u Bushinwa kohereza ibihumbi by’ingabo zabwo mu kibaya cya Galwana zikigarurira igice cyabwo kingana na Kilometero 38,000. Ni kenshi mu myaka irenga 30 ishize ibihugu byombi byagiranye ibiganiro bigamije guhosha buriya bwumvikane buke, gusa ibiganiro ntacyo byigeze bitanga.

Intambara izwi mu mateka yasakiranyije u Buhinde n’u Bushinwa ni iyabaye mu 1962, itikiriramo ibihumbi by’Abasirikare b’Abahinde. Ni mu gihe mu 1975 ari bwo ingabo z’ibihugu byombi zaherukaga kurasana urufaya rw’amasasu, mu bushyamirane bwaguyemo abasirikare bane b’Abahinde.

What's Your Reaction?

like
0
dislike
0
love
0
funny
0
angry
1
sad
0
wow
0