Abayisenga Emmanuel umunyarwanda wivuganye umupadiri mu Bufaransa,yari yarahawe umugisha na Papa Francis mu 2016

Abayisenga Emmanuel umunyarwanda wivuganye umupadiri mu Bufaransa,yari yarahawe umugisha na Papa Francis mu 2016

Umunyarwanda wishyiriye polisi yirega ko yishe umupadiri wari umucumbikiye mu Burengerazuba bw’u Bufaransa kuri uyu wa Mbere, yahuye na Papa Francis mu 2016 nk’uko byatangajwe n’ikinyamakuru cya Kiliziya Gatolika mu Bufaransa.

Yitwa Abayisenga Emmanuel, afite imyaka 40 y’amavuko akaba ari na we ukekwaho kuba yaratwitse Cathédrale ya Nantes, iherereye mu Majayaruguru y’Uburengerazuba bw’u Bufaransa, muri Nyakanga 2020.

Umupadiri wishwe yitwa Fr. Olivier Maire w’imyaka 61 y’amavuko akaba ari we wari uhagarariye umuryango w’abihayimana b’abamisiyoneri ba Montfort.

Urupfu rwe rwatangajwe kuri uyu wa 9 Kanama 2021 na Minisitiri w’Umutekano mu Bufaransa, Gérald Darmanin.

Inama y’Abepisikopi Gatolika mu Bufaransa, yasohoye itangazo rivuga ko Abayisenga yabanaga na Fr. Olivier Maire muri komine ya Saint-Laurent-sur-Sèvre ihereye mu Karere ka Vendée aho yiciwe.

Ifoto yagiye ahagaragara, yafashwe ku ya 11 Ugushyingo 2016, yatangajwe bwa mbere n’Ikinyamakuru La Croix cya Kiliziya Gatolika, yerekana umugabo witwa Abayisenga asuhuza Papa Francis, ubwo yagiranaga umubonano n’abantu bo mu cyiciro giciriritse i Vatican.

Iki kinyamakuru kigaruka ku rupfu rwa Fr. Maire, cyemeje ko Abayisenga ari we wabonanye na Papa nk’uko agaragara muri iyo foto, mu 2016.

Hari mu muhuro w’abantu badakunda guhabwa agaciro wari wateguwe n’umuryango witwa Fratello, ubwo hizihizwaga Yubile y’umwaka w’impuhwe muri Kiliziya Gatolika, witabiriwe n’abo mu Bufaransa, Poland na Roma.

Ikinyamakuru la Croix gikomeza kivuga ko icyo gihe Abayisenga yitabiriye uyu muhango avuye i Nantes ari kumwe n’itsinda ry’abandi bantu.

Uy mupadiri yari yaramugiriye neza kuko nyuma y’aho Abayisenga afunzwe akekwaho gutwika kiliziya ya Nantes akaza gufungurwa kuko inzego z’ubutabera zasanze atari mutaraga mu mutwe, Padiri Olivier Maire yamwakiranye yombi ndetse anamuha icumbi mu nyubako z’umuryango yayoboraga. Nyuma y’ineza yamugiriye, yahisemo kumwivugana mu buryo bwa kinyamaswa.