Amajyepfo: Abanyeshuri 26 banduye Covid-19, abandi 28 bagaragaza ibimenyetso

Amajyepfo: Abanyeshuri 26 banduye Covid-19, abandi 28 bagaragaza ibimenyetso
Nyuma y’igikorwa cyo gupima Covid-19 cyatangijwe mu bigo by’amashuri bitandukanye mu Ntara y’Amajyepfo kuri uyu wa 18 Ugushyingo 2020, byagaragaye ko abanyeshuri 26 banduye iki cyorezo mu gihe abandi bagera kuri 28 bagaragaje ibimenyetso.

Ibigo byagaragayemo abanyeshuri banduye birimo Urwunge rw’Amashuri rwa Mugombwa mu Karere ka Gisagara rwagaragayemo 9 n’abandi 4 bafite ibimenyetso, muri 40 bapimwe. Umuyobozi w’Akarere ka Gisagara, Rutaburingoga Jerome yatangarije Igihe ko 7 muri aba banduye ari abaturuka mu nkambi ya Mugombwa ibamo impunzi zo muri Repubulika ya Demukarasi ya Congo.

Urwunge rw’Amashuri rwa Kigeme mu Karere ka Nyamagabe rwagaragayemo abanduye 13 mu bipimo 40 byafashwe, Urwunge rw’Amahuri rwa Gasaka muri Nyamagabe rwagaragayemo abanduye 4 mu bipimo 40 byafashwe.

Naho Urwunge rw’Amashuri rwa Kavumu mu Karere ka Nyanza rwagaragayemo 24 bafite ibimenyetso mu bipimo 40 byafashwe.

Hari ibindi bigo by’amashuri kandi byapimwe ntibyabonekamo abanduye cyangwa abagaragayeho ibimenyetso. Ibi birimo G.S.O Butare mu Karere ka Huye, yapimwemo 30, Ishuri ribanza rya Rango muri Huye ryapimwemo 30, G.S St. Bernadette ryapimwemo 40,

TTC Cyahinda St Jean Baptiste ryapimwemo 40, G.S St Paul Kibeho ryapimwemo 40, E.S Mukingi ryapimwemo 42, G.S Shyogwe ryapimwemo 40, G.S Gitarama ryapimwemo 40, G.S Ruhango Catholic ryapimwemo 39, St. Trinite de Nyanza ryapimwemo 40.

Muri Kaminuza y’u Rwanda, ishami rya Huye, naho hapimwe abanyeshuri 105, bose bigaragara ko ari bazima.

Ku bufatanye na Minisiteri y’Ubuzima, iki gikorwa kirakomeje aho hazakomeza gupimwa abanyeshuri, abarimu n’abandi babikoramo. Abanduye icyorezo n’abagaragaje ibimenyetso bashyizwe ukwabo kugira ngo batanduza bagenzi babo.

like
0
dislike
0
love
0
funny
1
angry
0
sad
0
wow
0