Amasogisi Michael Jackson yasize agiye kugurwa akayabo k’amadorari

Amasogisi Michael Jackson yasize agiye kugurwa akayabo k’amadorari

Amasogisi ya Michael Jackson aherekejwe n’urupapuro yasize ashyizeho umukono, uzatanga agatubutse kurusha abandi ugereranije n’igiciro cyabyo byombi azabyegukana.

Michael Jackson utarabona umusimbura ku Bwami w’injyana ya Pop ku isi, yatabarutse muri 2009. Nubwo atakiriho, imitungo yasize yinjiza agatubutse buri mwaka.

Hashize iminsi itatu gusa hasohotse inkuru ivuga ko uyu mwaka Michael Jackson ari we winjije menshi mu byamamare bitakiriho aho yinjije miliyoni 60 z’amadorali.

Aya mafaranga yatumye ubutunzi bwe buzamuka ubu burabarirwa kuri miliyari 2.1 mu gihe umwaka ushize bwabarirwaga kuri miliyari 1.8.

Kuri ubu amasogisi ye yashyizwe ku isoko na DiLeo wafashije Micheal Jackson mu iterambere ry’umuziki we, hagati y’1984 n’1989. Icyo gihe yari yaramusinyishije mu nzu ye ifasha abahanzi yitwaga Epic Records bakorana mu gihe kingana n’imyaka itanu.

Aya masogisi abitswe na DiLeo, Michael Jackson yayabyinanye bwa mbere mu mbyino yari azwiho ya “Moonwalk” byari 1983, yayabyinanye kandi imbonankubone mu kiganiro Motown 25: Yesterday, Today, Forever cyacaga kuri Televiziyo ari kumenyekanisha indirimbo ye Billie Jean.

Ibinyamakuru byinshi birimo TMZ na TUKO byanditse ko Frank DiLeo washyize ku isoko aya masogizi, avuga ko ayifuzamo byibura ibihumbi 972 by’amadorari. Ubu abifuza kuyagura ngo bamaze kuba benshi kandi bishyura ama miliyoni.

Si ubwa mbere bimwe mu byo Michael Jackson yambaye bishyizwe ku isoko kandi ku mafaranga menshi kuko umwaka ushize inkweto yambaye mu myaka irenga 36 ishize zashyizwe mu cyamunara.

Yari yarazihaye umubyinnyi wari inshuti ye witwa Lester Wilson ari na we waje kuzitanga zigashyirwa mu bubiko aho zari zimaze imyaka irenga makumyabiri.


Michael Jackson nubwo atakiriho yinjiza menshi ku mwaka


Inkweto za Michael Jackson zashyizwe ku isoko umwaka ushize