Amerika: Imyigaragambyo yafashe indi ntera nyuma y’urupfu rw’umwirabura George Floyd

Amerika: Imyigaragambyo yafashe indi ntera nyuma y’urupfu rw’umwirabura George Floyd

Imyigaragambyo muri Leta Zunze Ubumwe za Amerika yafashe indi ntera, kugeza ubwo umuyobozi w’Umujyi wa Minnesota yatangaje ko agiye kwifashisa abasirikare, kuko bisa n’aho impamvu yatangije imyigaragambyo yahindutse.

Imyigaragambyo yatangiye ubwo umupolisi yashikamiraga ku ijosi umugabo w’umwirabura witwa George Floyd w’imyaka 46, nyuma akaza kwitaba Imana.

Guverineri wa Leta ya Minnessota Tim Walz, yatangaje ko aho bucyera mu mihanda hashyirwamo abasirikare, kuko bitangiye kugaragara ko imyigaragambyo irimo kuba itagishingiye ku rupfu rwa George Floyd rwabaye ku wa Mbere w’iki Cyumweru.

Yagize ati "Mu ijoro ryakeye byari bitangaje bikisanisha nk’aho ari ukubera urupfu rwa George Floyd cyangwa ubusumbane. Ni ukwibasira inzego zitari iza leta, ni ugutera ubwoba.”

Guverineri Walz yabivuze nyuma y’uko imyigaragambyo yari imaze gukwira uduce dutandukanye, ndetse ibintu byinshi bitangira gutwikwa. Ni ibikorwa byatangiye ku wa mbere ubwo Floyd w’imyaka 46 yaterwaga ibikomere byamuviriyemo urupfu, ndetse umupolisi wo muri Minneapolis wabigizemo uruhare yatawe muri yombi.

Walz yavuze ko abarimo kugira uruhare mu bugizi bwa nabi bigaragara ko nta nyungu bafite mu rupfu rwa Floyd.

Kugeza kuri uyu wa Gatanu imyigaragambyo yari imaze kugera mu mijyi 30, aho abigaragambya bamennye amadirishya y’inzu zitandukanye, batwika amapine ndetse bafunga imihanda itandukanye.

Imyigaragambyo yatangiriye muri Minneapolis aho umupolisi yashikamiriye Floyd, ariko ikomeza kototera indi mijyi, bituma hatangira gushyirwa abasirikare mu mihanda nk’uko CNN yabitangaje.

Muri Atlanta imyigaragambyo yari yatangiye mu ituze, ariko biza guhindura isura ubwo abaturage batwikaga imodoka ya polisi, banamenagura ibirahuri by’icyicaro gikuru cya CNN kizwi nka CNN Center.

Guverineri wa Leta ya Georgia, Brian Kemp, na we yavuze ko agiye kohereza abasirikare mu mihanda agamije kurengera abaturage ba Atlanta.

Meya wa Atlanta, Keisha Lance Bottoms, yagize ati "Ibyo ndimo kubona biba ku mihanda yo muri Atlanta si ibyo muri Atlanta. Ibi si imyigaragambyo. Iyi siyo myumvire ya Martin Luther King, Jr. Ibi ni akaduruvayo.”

Muri Washington naho, White House yabaye ifunzweho kugira ngo hagenzurwe neza umutekano.

Mu makuru mashya yagiye hanze ni uko umugore wa Derek Chauvin, umupolisi ukurikiranweho urupfu rwa George Floyd, yahise yandikira urukiko asaba gatanya.

Derek Chauvin yatawe muri yombi kuri uyu wa Gatanu akurikiranweho ubwicanyi. Biteganyijwe ko uyu mugabo w’imyaka 44 azagezwa imbere y’urukiko ejo ku wa Mbere.