Amerika: Umusaza w’Umunyarwanda yagonzwe n’imodoka yitaba Imana

Amerika: Umusaza w’Umunyarwanda yagonzwe n’imodoka yitaba Imana

Muhizi Pierre Célestin w’imyaka 76 y’amavuko yitabye Imana nyuma yo kugongwa n’imodoka mu Mujyi wa Portland muri Leta ya Maine muri Amerika.

Impanuka yahitanye Muhizi yabaye ku mugoroba wo ku Cyumweru gishize, ubwo imodoka yinjiraga mu kibuga gikinirwamo umukino wa Baseball giherereye muri Deering Oaks Park, iramugonga agakomereka bikomeye.

NewscenterMaine yanditse ko uwo musaza yahise ajyanwa kwa muganga ariko kubera ibikomere aza kwitaba Imana ku wa Mbere.

Umuyobozi muri Polisi ya Portland, Lieutenant Dan Hondo, yavuze ko Jonathan Burt kugira uruhare mu rupfu rwa Muhizi yahise atabwa muri yombi.

Mu mashusho yafashwe ari muri gereza, Burt w’imyaka 29 ukekwaho uruhare mu rupfu rwa Muhizi yahamijwe icyaha cy’ubwicanyi no gutunga intwaro, gukoreshwa ibiyobyabwenge, kunyuranya n’amabwiriza agenga gufungurwa, no gukora nta ruhushya rubimwemerera.

Umutangabuhamya wabonye impanuka iba yavuze ko byabaye mu gihe hari umukino w’abana wakinwaga ariko ababyeyi babo bari kuwureba.

Uwitwa Barbara yagize ati “Umugore yaje yiruka avuza induru. Muve mu nzira, muve mu nzira.’’

‘‘Numvise urusaku…nyuma mbona iyi modoka y’umukara isatira ifite urusaku ikubita intebe ahari abagabo babiri bahicaye.’’

Barbara yavuze ko yabonye uwo musaza yiterera mu kirere nyuma yaho. Yahise ajyanwa kuri Maine Medical Center muri Portland ari naho yaje kugwa.

Imodoka yahagarariye mu kibuga aho bivugwa ko yangije ibikoresho by’ikibuga ariko ntiyagonze abana bakinaga.

Icyateye impanuka y’imodoka ntikiramenyekana ariko umushoferi n’umugenzi bari bayirimo bitaweho havurwa ibimenyetso bigaragaza ko bari basinze.

Mu rwego rwo guherekeza nyakwigendera, hashyizweho gahunda yo gukusanya inkunga binyuze ku rubuga rwa GoFundMe.