Amerika: Urujijo ku rupfu rwa Yves Gakuba Umunyarwanda wiciwe hafi y’akabari

Amerika: Urujijo ku rupfu rwa  Yves Gakuba Umunyarwanda wiciwe hafi y’akabari

Hakomeje kuba urujijo ku rupfu rw’Umunyarwanda, Yves Gakuba wabaga muri Leta ya Colarado wishwe nyuma yo kuva mu kabari kuwa 2 Ugushyingo hafi y’ahitwa Mariposa.

Gakuba w’imyaka 34 nk’uko CBS4 dukesha iyi nkuru ivuga ko amakuru y’uko uyu Munyarwanda yishwe yamenyekanye nyuma y’aho yari avuye mu Kabari kitwa Pioneer kari hafi na kampisi (Campus) ya Kaminuza ya Denver.

Uretese kuba polisi yo muri ako gace ivuga ko Gakuba yakorewe ubwicanyi kandi ko iri kubikoraho iperereza, ntishaka kugira ikindi itangaza ku rupfu rwe ndetse ikomeje guhamagaza abatangabuhamya.
 

Umwe mu bakora ku kabari Pioneer, Denise Jones yavuze ko Gakuba yageze ku kabari kuwa 1 Ugushyingo gusa ngo nyuma ajya kunywera ahandi.

Avuga ko we na bagenzi be baje kumenya iby’urupfu rwe nyuma. Ati “ Birababaje kuba tutazongera kumubona. Yari umuntu wakundwaga n’abantu. Washoboraga guhita umwiyumvamo mugihura,”

Byaradutunguye ubwo batubazaga igihe duherukira kumubona, twumvaga ko nta cyabaye.”

Inshuti za Gakuba zatangaje ko uyu mugabo yari asanzwe akora akazi ka za purogaramu za mudasobwa.

Abantu benshi muri ako gace bategereje cyane ibizava muri iki kibazo. Inzego z’umutekano akenshi zizwiho kudatangaza ibijyanye n’iperereza. Igihe ritararangira.

Kugeza ubu amakuru ahari ni uko Gakuba yagabweho igitero ubwo yasohokaga mu kabari. Ntibitangazwa niba yaratewe ibyuma cyangwa yararashe. Kuwa Mbere, polisi ntacyo yari yagatangaje kuri aya makuru.

Mu gihe polisi itaratangaza icyishe Gakuba, abo mu muryango we bakomeje gushaka amafaranga yo kohereza umurambo mu Rwanda ngo ushyingurwe.

Abo mu muryango we babwiye CBS4 ko “ Batarahuguka neza ku buryo baganira n’itangazamakuru ku byabaye.”

Igikorwa cyo kumwohereza mu Rwanda kiri gukorwa na bakuru be babiri babanaga muri Amerika nk’uko Paji ya Facebook, GoFundMe ibitangaza.