APR FC yikomye Umutoza Mashami wavuze ko yanze gutanga Mutsinzi Ange mu Amavubi

APR FC yikomye Umutoza Mashami wavuze ko yanze gutanga Mutsinzi Ange mu Amavubi

Ikipe ya APR FC yanyomoje ibiherutse gutangazwa n’Umutoza w’Amavubi, Mashami Vincent, nyuma yuko myugariro wo hagati, Mutsinzi Ange, atitabiriye ubutumire bw’Ikipe y’Igihugu iri kwitegura umukino wa Ethiopia.

Mutsinzi Ange wagiriye ikibazo mu mukino w’Umunsi wa Mbere wa Shampiyona wabaye tariki ya 4 Ukwakira, yasubukuye imyitozo ku wa Kane tariki ya 10 Ukwakira 2019, aho yari yahawe ikiruhuko cy’iminsi itatu n’abaganga b’ikipe.

Ubwo yasubukuraga imyitozo ku wa Kane w’icyumweru gishize, Mutsinzi yatangarije urubuga rwa internet rwa APR FC ko yumva ameze neza ndetse yiteguye kongera gufatanya na bagenzi be.

Ati "Nibyo koko sinabashije kugaragara mu mukino w’umunsi wa kabiri wa shampiyona kuko iminsi muganga yari yampaye yari itararangira, ariko ubu ndumva meze neza nta kibazo no mu myitozo mwabibonye ko nta kibazo mfite. Muri make niteguye kuza gufatanya na bagenzi banjye kwitegura umukino wa gatatu wa Shampiyona [Wahuje APR FC na Etincelles FC].’’

Nyuma y’umunsi atangiye imyitozo, yagiriwe icyizere n’Umutoza Mukuru w’Ikipe y’Igihugu ‘Amavubi’, Mashami Vincent, ahamagarwa mu bitegura umukino wa gicuti na Tanzania wabaye ku wa Mbere n’uwa Ethiopia uzaba ku wa Gatandatu, tariki ya 19 Ukwakira 2019 mu ijonjora rya nyuma ryo gushaka itike ya CHAN 2020 izabera mu Cameroun.

Mutsinzi ntabwo yitabiriye ubu butumire ndetse ubwo Mashami Vincent yaganiraga n’itangazamakuru nyuma y’umukino wa Tanzania yavuze ko yizeye ko bashobora kumubona kuko yari amaze iminsi akorera imyitozo muri APR FC.

Ati ”Mutsinzi twari twamuhamagaye baza kutubwira ko arwaye, ariko nyuma numva ko yatangiye imyitozo mu ikipe ye, wenda natwe azaza kuyikora turakomeza gutegereza, kuko ndatekereza ko igihugu kiruta ibindi byose.”

Mu butumwa burebure bwoherejwe n’Umuvugizi wa APR FC, Kazungu Claver, yanyomoje ibyavuzwe na Mashami avuga ko iyi kipe yanze gutanga umukinnyi mu Amavubi.

Ati ”Mwiriwe neza. Ikipe ya APR FC iranyomoza amakuru yatangajwe n’Umutoza w’Ikipe y’Igihugu ‘Amavubi’, Mashami Vincent, yavuze ko atahawe umukinnyi myugariro wa APR FC, Mutsinzi Ange Jimmy, kandi ari muzima!!!”

“APR FC ntishobora kwanga gutanga umukinnyi umeze neza ntabwo birabaho no mu myaka myinshi yatambutse! Kuko no mu mpamvu zituma APR FC ikoresha abakinnyi b’Abanyarwanda gusa 100% ni ukugira ngo Ikipe y’Igihugu y’u Rwanda ibone abakinnyi beza.”

Kazungu yavuze ko icyatumye Mutsinzi Ange atitabira ubutumire bw’Amavubi ari ubusabe bw’abaganga b’Ikipe y’Ingabo.

Ati ”Urugero rwiza rwa vuba cyane rw’uko APR FC itanga abakinnyi mu ikipe y’igihugu ni uko mu kwitegura umukino wa Ethiopia iwayo, Mashami yahamagaye abakinnyi 11 ba APR FC kandi bose bagiye mu Ikipe y’Igihugu.”

“Ntabwo APR FC yakwanga gutanga umukinnyi umeze neza ahubwo ni uko Mutsinzi Ange yabujijwe n’abaganga kudakina umukino uwo ariwo wose. Ni mpamvu Mutsinzi Ange Jimmy atakoreshejwe ku mukino APR FC yahuyemo na Etincelles Fc kandi atazakoreshwa no ku mukino wa Marine Fc ku wa Kabiri i Rubavu.”

Kazungu yakomeje avuga ko Mutsinzi Ange yemerewe gukora imyitozo gusa ariko adashobora gukina kubera ikibazo yagize mu mutwe.

Ati ”Mutsinzi Ange kubera ikibazo gikomeye yagize mu mutwe, abaganga bamubwiye ko n’igihe azagaruka mu kibuga nagira isesereri azasaba gusimburwa vuba. Hareke gukwizwa ibihuha, kubeshya no kuyobya Abanyarwanda kandi batabajije ubuyobozi bwa APR FC ndetse na muganga w’ikipe.”

Mutsinzi Ange ni umukinnyi wa APR FC guhera muri Nyakanga 2019 nyuma yo kuyigeramo avuye muri Rayon Sports yari amazemo imyaka itatu.

Yahamagawe bwa mbere mu Ikipe y’Igihugu mu kwezi gushize, aho Amavubi yiteguraga imikino ibiri irimo uwa gicuti yatsinzemo Repubulika Iharanira Demokarasi ya Congo ibitego 3-2 n’uwo yatsinzemo Ethiopia igitego 1-0.