Ari Senegal na Algeria ni nde uzatwara CAN ya 2019?mu myaka 29 ishize cyari muri Algeria mu gihe Senegal itazi uko gisa

Ari Senegal na Algeria ni nde uzatwara CAN ya 2019?mu myaka 29 ishize cyari muri Algeria mu gihe Senegal itazi uko gisa

Mu makipe 24 yahataniraga igikombe cya Afurika hasigaye abiri, Les lions de la Teranga na Les Fennecs d'Algérie, amakipe yombi azisobanura ku wa gatanu ku mukino wa nyuma i Cairo.

Algeria yazamutse mu itsinda C idatsinzwe igitego na kimwe, igeze ku mukino wa nyuma itaratsindwa umukino n'umwe ndetse imaze gutsinda ibitego 12 mu gihe yo yinjijwe bibiri gusa.

Senegal byari kumwe mu itsinda yazamutse ari iya kabiri, imaze gutsindwa umukino umwe yatsinzwe na Algeria mu itsinda (1 - 0). Yinjije ibitego umunani itsindwa igitego kimwe gusa yatsinzwe na Algeria.

Ni amakipe yombi ahagaze neza, afite abakinnyi bakomeye kandi barimo abazwi cyane nka Sadio Mane wa Liverpool na Riyad Mahrez wa Manchester City.

Aya makipe yageze ku mukino wa nyuma ahigitse ibihangange, Algeria yaraye itsinze Nigeria 2 -1, igitego cy'intsinzi bakibonye ku munota wa nyuma gitsinzwe na Riyad Mahrez, mu mukino amakipe yombi yagaragaje imbaraga n'umupira mwiza.

Senegal yo yatsinze Tunisia bigoranye cyane ubwo umukinnyi Dylan Bronn yitsindaga igitego mu minota y'inyongera kuko amakipe yombi yari yaguye miswi mu minota 90 isanzwe.

Senegal ni inshuro ya kabiri igeze ku mukino wa nyuma w'igikombe cya Afurika gusa ntiragitwara na rimwe.

Mu 2002 ubwo yatozwaga na Bruno Metsu yatsinzwe na Cameroun ku mukino wa nyuma. Muri uwo mwaka ni nabwo yageze kure mu gikombe cy'isi, muri 1/4.

Umunyezamu Alfred Gomis na rutahizamu Keita Baldé bishimira intsinzi kuri Tunisia
Umunyezamu Alfred Gomis na rutahizamu Keita Baldé bishimira intsinzi kuri Tunisia

Algeria iki gikombe iheruka kugitwara mu myaka 29 ishize, mu gikombe cy'isi imaze kujyayo inshuro eshatu, inshuro imwe mu 2014 nibwo yabashije kurenga amatsinda gusa.

Kuva mu 1977 Les lions de la Teranga na Les Fennecs d'Algérie zimaze guhura inshuro 22, Algérie ikaba imaze gutsinda Senegal inshuro 14, naho Senegal yatsinze inshuro enye, banganyije imikino itanu.

Mu mikino itanu iheruka guhuza aya makipe Algeria yatsinze imikino ine, banganya umukino umwe.

Umwe mu bakinnyi ba Algeria mu byishimo n'umunyezamu Raïs M'Bolhi bamaze gutsinda Nigeria
Umwe mu bakinnyi ba Algeria mu byishimo n'umunyezamu Raïs M'Bolhi bamaze gutsinda Nigeria

Umutoza Aliou Cissé wa Senegal aherutse gutangaza ko "yizeye neza ko uyu mwaka ari igihe cyabo cyo kwegukana igikombe cya Afurika cya mbere".

Umutoza Djamel Belmadi nawe yatangaje ko igikombe Algeria iheruka gutwara iri iwayo hari kera, ko intego yabo ubu ari "ukwandika amateka mashya, n'abakinnyi bakandika amateka yabo".