Bamporiki yibasiye Rusesabagina amwereka ko ibyo yakoze nta gishya kuko n'izina rye rihakana urwa mubyaye

Bamporiki yibasiye Rusesabagina amwereka ko ibyo yakoze nta gishya kuko n'izina rye rihakana urwa mubyaye
Umunyamabanga wa Leta muri Minisiteri y’Urubyiruko n’Umuco, Bamporiki Edouard, yifatiriye ku gahanga Paul Rusesabagina uheruka gutangaza ko atari Umunyarwanda.

Ku wa Gatatu tariki ya 17 Gashyantare, ni bwo Rusesabagina n’abahoze ari abarwanyi b’umutwe wa FLN ushamikiye ku mpuzamashyaka ya MRCD yari abereye umuyobozi, batangiye kuburanishwa mu mizi.

Bose uko ari 21 bakurikiranweho ibyaha bifitanye isano n’iterabwoba, byakorewe mu majyepfo y’u Rwanda hagati ya 2017 na 2019.

Urubanza rwabereye mu cyumba cy’urukiko rw’ikirenga ku Kimihurura, mu rwego rwo kwirinda ikwirakwira ry’icyorezo cya COVID-19.

Ingingo yo kuba Rusesabagina yarahakanye ko ari Umunyarwanda nyamara yaravukiye mu rw’imisozi igihumbi, ni imwe mu zikomeje kugarukwaho ku mbuga nkoranyambaga.

Bigitangira umucamanza nk’uko yabigenzaga ku baregwa bose, yabajije Rusesabagina niba yemera imyirondoro ye n’ibyaha aregwa yari amaze gusomerwa n’umwanditsi w’urukiko.

Rusesabagina mu magambo ye yagize ati: “Murakoze cyane Nyakubahwa Perezida, ndagira ngo mbabwire ko umwirondoro wanjye atari wo uko wagombaga kuba umeze. Ntabwo njyewe ndi Umunyarwanda. Ndagira ngo nongere mbisobanure ku nshuro ya gatanu.”

Yakomeje agira ati “Nagiye mbisobanura mu nzego zose. Umwirondoro wanjye siwo kuko ntabwo ndi Umunyarwanda. Ndi Umubiligi.”

Ubwo yari ahawe umwanya ngo agaragaze niba nta nzitizi zitamwemerera kuba yakomeza iburanisha, Rusesabagina yongeye gushimangira ko ari Umubiligi bityo inkiko zo mu Rwanda zidafite ububasha bwo kumuburanisha.

Ati: "Njye nk’Umubiligi waje nshimuswe, nabonaga urukiko rudafite ubushobozi bwo kumburanisha. Umwavoka wanjye yabisobanura mu magambo arambuye."

Ni amagambo yatumye abatari bake bacika ururondogoro, abenshi baha urw’amenyo uriya mugabo.

Bamporiki kuri Twitter ni umwe mu bahaye urw’amenyo Rusesabagina, agaragaza ko ibyo yatangaje byatumye asiga umugani.

Ati: "GUSESABAGINA; ni ukwihakana igihugu kavukire mu rwa kavukire. Ibi byabaye ahasaga 2021 ubwo u Rwanda rwari ruhanganye n’ibyorezo 3: Ibyihebe bihetse bibiriya, Abapfobya Jenocide yakorewe Abatutsi na Covid-19. Ni bwo Rusesa, yatunguranye ati si ndi Umunyarwanda, ndi impfubyi Mbirigi."

Ambasaderi w’u Rwanda mu Buholandi, Olivier Nduhungirehe, we yibajije impamvu Rusesabagina yatanze ikirego mu rukiko rw’Umuryango wa Afurika y’Iburasirazuba kandi atari Umunyarwanda.

Ati: "Paul Rusesabagina mu rubanza rwe muri iki gitondo yatangaje ko atari Umunyarwanda kandi ko agomba kuburanishwa n’inkiko z’Ububiligi. Nyamara mu mwaka ushize yatanze ikirego mu rukiko rw’Umuryango wa Afurika y’Iburasirazuba nk’Umunyarwanda, nk’umuturage wa EAC."

Uwahoze ari Minisitiri w’Ububanyi n’Amahanga w’u Rwanda, Dr Richard Sezibera, na we yatangajwe no kuba Rusesabagina yihakanye u Rwanda.

Ati: "Rusesabagina noneho aravuga ko atari Umunyarwanda. Aribwira ko abanyamahanga n’abanditsi b’inkuru mpimbano bo muri hollywood bashobora kumukiza kubazwa ibikorwa bye by’iterabwoba yakoreye inzirakarengane z’abenegihugu. Ntabwo bishoboka kandi ntibizashoboka."

like
2
dislike
1
love
1
funny
0
angry
0
sad
1
wow
1