Banki zasabwe gufunga amwe mu mashami yazo mu gukumira ikwirakwira rya COVID-19

Banki zasabwe gufunga amwe mu mashami yazo mu gukumira ikwirakwira rya COVID-19

Ihuriro ry’Amabanki mu Rwanda (RBA) ryasabye banki zose gufunga amashami yazo mu gihugu ariko zibanda ku yo mu Mujyi wa Kigali hagamijwe gukumira ikwirakwira ry’icyorezo cya COVID-19 giterwa na Coronavirus.

Mu itangazo ryo ku mugoroba wo ku wa 24 Werurwe 2020, RBA yagaragaje ko iki cyemezo cyafashwe bijyanye n’ingamba zashyizweho zo guhangana n’ubwiyongere bwa COVID-19.

Kuva umurwayi wa mbere yaboneka mu Rwanda ku wa 14 Werurwe 2020, abagera kuri 40 ni bimaze kwemezwa ko banduye iki cyorezo cyibasiye Isi.

Itangazo ryashyizweho umukono n’Umuyobozi Mukuru wa RBA, Robin Bairstow, rivuga ko “RBA yasabye amabanki gufunga by’agateganyo amwe mu mashami yayo by’umwihariko ayo mu Mujyi wa Kigali mu kugabanya ikwirakwira rya COVID-19 no gushyigikira ingamba zashyizweho na leta zo gukuraho ingendo zitari ngombwa mu gihugu.’’

RBA yijeje gukomeza kugenzura uko ikibazo kimeze, kumenyesha abanyamuryango, abakozi, abakiliya n’abandi bafatanyabikorwa amakuru agezweho kuri COVID-19.

Mu butumwa bwa RBA igira iti “Buri banki izamenyesha abakiliya bayo binyuze mu buryo isanzwe ibikoramo uko bazakomeza kubona serivisi z’ikoranabuhanga.”

Leta y’u Rwanda yafashe ingamba zo guhangana n’ikwirakwira rya COVID-19 zirimo gufunga ibigo by’amashuri na kaminuza, insengero no guhagarika ibikorwa bihuriza hamwe abantu benshi.

Minisiteri y’Ubuzima yasabye abaturarwanda gukomeza kwitwararika no gukurikiza ingamba zashyizweho na Leta zijyanye no kwirinda ikwirakwira rya COVID-19 zirimo guhagarika ubucuruzi bw’ibikorwa bitari iby’ibanze, guhagarika ingendo zihuza imijyi n’uturere n’izindi zitari ngombwa no kuva mu rugo nta mpamvu zihutirwa.

Abantu bose bageze mu Rwanda mu byumweru bibiri bishize basabwa kwishyira mu kato mu gihe cy’iminsi 14 guhera igihe bagereye mu Rwanda ndetse no gukurikiza amabwiriza y’inzego z’ubuzima yo gukaraba intoki kenshi kandi neza no kubahiriza intera ya metero imwe hagati y’abantu.

Ku wa 21 Werurwe 2020 saa 23:59, nibwo Minisitiri w’Intebe, Dr Ngirente Edouard, yasohoye amabwiriza avuga ko ingendo zitari ngombwa zihagaritswe, abantu basabwa guhagarika gusohoka mu rugo nta mpamvu zihutirwa, uretse abatanga n’abashaka serivisi z’ingenzi zirimo kwivuza, guhaha, iza banki n’izindi.

Serivisi za banki zari zimaze iminsi itatu zikoreshwa ariko hibandwa ku kwinjiza abakiliya bazo mu gukoresha ikoranabuhanga haba mu kubitsa no kubikuza amafaranga.

Ku wa 18 Werurwe 2020 nibwo Banki Nkuru y’u Rwanda (BNR) yanzuye kwemerera amabanki gusubiramo amasezerano y’inguzanyo kugira ngo azorohereze abayabereyemo imyenda mu gihe cyo kwishyura, yanakuyeho ibiciro byo guhererekanya amafaranga ku bigo by’itumanaho mu guhangana n’ingaruka za Coronavirus ku bukungu bw’u Rwanda.

Mu gushishikariza abantu kwishyurana no kohererezanya amafaranga batayahererekanyije mu ntoki bishobora gukwirakwiza Coronavirus, BNR yemeje ko mu mezi atatu uhereye tariki 19 Werurwe 2020 nta kiguzi kizongera gucibwa umuntu ukura amafaranga kuri konti yo muri banki ayashyira kuri Mobile Money cyangwa ayakura kuri Mobile Money ayohereza kuri banki.

BNR yatangaje ko izakomeza gukurikirana ishyirwa mu bikorwa ry’izo ngamba no gukomeza gusesengura ingaruka za Coronavirus kandi yiteguye kuba yafata izindi ngamba zikwiye.