BPR Plc yahaye Abadivantisiti ikoranabuhanga rizajya ryifashishwa mu gutura

BPR Plc yahaye Abadivantisiti ikoranabuhanga rizajya ryifashishwa mu gutura

Banki y’Abaturage y’u Rwanda (BPR Atlas Mara), ku bufatanye na Mo-pay yashyizeho uburyo bw’ikoranabuhanga abayoboke b’itorero ry’Abadivantisiti b’umunsi wa karindwi bazajya bifashisha mu gutanga icyacumi n’amaturo.

Kuwa 14 Ukwakira nibwo Itorero ry’Abadivantisiti b’umunsi wa karindwi ku bufatanye na Banki y’Abaturage y’u Rwanda bamuritse iri koranabuhanga ryiswe CFMS (Church Financial Management System).

Iri torerero rifite abayoboke mu mpande zose z’u Rwanda ryatekereje gushyiraho ubu buryo bwa CFMS mu rwego rwo gukangurira abayoboke baryo kugendana n’iterambere ndetse no kugabanya uburyo bwo guhanahana amafaranga.

Umuvuguzi w’iri torero mu Rwanda, Pst Byiringiro Hezron, yavuze ko amatorero nayo akwiye kujyana n’iterambere.

Ati “Burya amajyambere ntagira ibyo asiga inyuma, ni ukuvuga ngo iterambere rigendana na byose yaba mu idini, yaba mu gihugu ndetse no mu miryango hose haba hagomba kugera iterambere.”

Ubu buryo bwo gukusanya amaturo hakoreshejwe ikoranabuhanga bwatangiranye mu nsengero z’abadivantisiti zisaga 2000 zo hirya no hino mu gihugu.

Umuyoboke w’iri torero azajya akoresha telefoni ye mu gutura, akanda*517# ubundi akurikize amabwiriza, ku bafite telefoni zigezweho bo bashobora no gukoresha porogaramu ya Mo-pay. Amaturo azajya atangwa azajya ajya kuri konti y’iri torero iri muri Banki y’Abaturage y’u Rwanda.

Ubu buryo bwo kwakira amaturo hakoreshejwe ikoranabuhanga Pst Byiringiro yavuze ko buzafasha abayoboke b’iri dini kwirinda Covid-19.

Ati “Nubwo twatekereje uyu mushinga mbere ya Covid-19 ariko kuri ubu uzatuma n’abayoboke bacu batandura kuko batazahanahana amafaranga batura.”

Umuyobozi ushinzwe ubucuruzi muri BPR Plc, Mugisha Shema Xavier, yavuze ko iri koranabuhanga rizazana impinduka mu buryo abayoboke b’iri dini bari basanzwe batura.

Ati “Ubu ntabwo bikiri ngombwa ko umuntu ajya kuri banki kuzana amafaranga ngo abone kuyatanga mu itorero. Ahubwo arajya abikorera kuri telefoni bimwihutire ndetse n’itorero amaturo abagereho mu buryo bworoshye.”

Yakomeje asaba andi madini n’amatorero akorera mu Rwanda ko babasanga nabo bakabafasha gukoresha ikoranabuhanga mu bijyanye n’amaturo.

Ati “Turakangurira amatorero atandukanye ko baza tugafatanya muri uru rugendo rwo gukoresha ikoranabuhanga kuko byorohereza abayoboke babo. Kandi ni byiza kuri leta y’u Rwanda muri gahunda bashyizeho yo gukoresha ikoranabuhanga mu kugabanya ihanahana ry’amafaranga.”

Banki y’Abaturage yatangiye gukorera mu Rwanda mu 1975, kuri ubu ifite amashami agera ku 184 n’aba-agent ba BPR Hafi barenga 300 mu gihugu hose. Serivisi zayo zirimo kubitsa, kubikuza no kohererezanya amafaranga zishobora kuboneka hifashishijwe ikoranabuhanga.