Burundi: Gen. Ndayishimiye yatsinze amatora y’Umukuru w’Igihugu by’agateganyo

Burundi: Gen. Ndayishimiye yatsinze amatora y’Umukuru w’Igihugu by’agateganyo
Gen. Maj. Evariste Ndayishimiye uzwi nka ‘Gen. Neva’ wari uhagarariye ishyaka rya CNDD-FDD riri ku butegetsi ni we umaze kwegukana amatora y’Umukuru w’Igihugu cy’u Burundi mu buryo bw’agateganyo.

Ibi byemejwe na Dr. Pierre Claver Kazihise uyoboye Komisiyo yigenga ishinzwe amatora muri iki gihugu, CENI, mu muhango wabaye ku gicamunsi cy’uyu wa 25 Gicurasi 2020, muri Hoteli Club du Lac Tanganyika.

Gen. Ndayishimiye yagize amajwi 68.72%, akurikirwa na Agathon Rwasa wa CNL, Gaston Sindimwo wa UPRONA we yagize ijwi 1.64%.

Gen. Neva yegukanye insinzi mu buryo bw’agateganyo asanzwe yahabwaga icyizere guhera mu kugaragara kw’umubare munini w’abamushyigikiye mu bikorwa byo kwiyamamaza ishyaka rya CNDD-FDD ryatangiye tariki ya 27 Mata, bikarangira tariki ya 16 Gicurasi 2020.

No mu makuru komisiyo zishyinzwe amatora muri za Komine no ntara, CECI/CEPI, byagaragaye ko Gen. Ndayishimiye aza imbere mu majwi, Agathon Rwasa uhagarariye CNL aza amukurikiye.

Mu gihe ibyavuye mu matora ndakuka byagaragaza ko Gen. Ndayishimiye ari we watsinze, yaba Umukuru w’Igihugu mushya w’u Burundi nyuma y’imyaka 15 Pierre Nkurunziza ayoboye iki gihugu.

Gen. Evaritse Ndayishimiye

Yavukiye muri Komine Giheta mu Ntara ya Gitega mu 1968. Ni umwe mu banyeshuri barokotse ubwicanyi Abarundi b’abahutu bakorewe muri Kaminuza y’u Burundi, icyo gihe mu 1995.

Yarahunze maze yinjira mu mutwe w’inyeshyamba za FDD (Forces de Défense de la Démocratie) wari ugizwe n’abahutu waremwe na Leonard Nyangoma nyuma y’iyicwa rya Melchior Ndadaye wabaye Perezida w’u Burundi kuva muri Nyakanga kugeza mu Gushyingo 1993.

Evariste Ndayishimiye (ibumoso) na Pierre Nkurunziza

Evariste Ndayishimiye yabaye umwe mu bayobozi bakuru b’umutwe wa FDD wari ufite ibirindiro mu ishyamba rya Kibira, riri mu majyaruguru y’uburengerazubwa bw’u Burundi, ari naho yakuye ipeti rya ‘General Major’.

Icyo gihe muri icyo gihugu hari hakomeje intambara ishingiye ku moko gusa mu 2000, impande zari zishyamiranye zasinyiye amasezerano y’amahoro muri Arusha/Tanzania, FDD yemera kurambika intwaro mu 2002, umutwe wa FDD uhinduka ishyaka rya CNDD-FDD.

Mu 2005, Gen. Ndayishimiye yagizwe umugaba Mukuru Wungirije w’Ingabo z’igihugu zitwaga FDN (Forces de Défence National). Kuva mu 2006 kugeza mu 2007, yabaye Minisitiri w’Umutekano w’imbere mu gihugu, aba n’umujyanama wa Perezida Nkurunziza mu bya gisirikare.

Tariki ya 26 Mutarama 2020 ni bwo ishyaka rya CNDD-FDD ryakoze inama, ritoranya Gen. Ndayishimiye ngo azarihagararira mu matora ya tariki ya 20 Gicurasi 2020. Yari asanzwe ari Umunyamabanga Mukuru wa waryo kuva mu 2016.

What's Your Reaction?

like
0
dislike
0
love
0
funny
0
angry
0
sad
0
wow
0