Burundi: Nkurunziza yagiye gutora ari ku igare

Burundi: Nkurunziza yagiye gutora ari ku igare

Ku wa Gatatu tariki 20 Gicurasi 2020, Abarundi barenga miliyoni eshanu bazindukiye mu matora y’umukuru w’igihugu, aho Pierre Nkurunziza usoje manda ze eshatu atorera mu Ntara ya Ngozi, Agathon Rwasa uhanganye n’ishyaka CDD-FDD anenga uko amatora yakozwe.

Kugeza ubu abakandida barindwi nibo bari muri aya matora, ariko abahabwa amahirwe cyane ni Evariste Ndayishimiye wo mu ishyaka rya CNDD-FDD na Agathon Rwasa wo muri CNL.

Nkurunziza umaze imyaka 15 ku butegetsi, yagiye gutora ari ku igare mu gace ka Buye mu Ntara ya Ngozi.

Ibitangazamakuru birimo BBC byamugaragaje ari ku murongo w’itora arinzwe mu buryo bukomeye.

Mu kiganiro gito yahaye itangazamakuru, Nkurunziza yagize ati “Aya matora ni meza cyane kuko nibwo bubaye ubwa mbere amafaranga yose akoreshejwe yatanzwe n’Abarundi, ibi bivuze ko yakozwe muri demokarasi.”

Nkurunziza avuga ko aya matora atandukanye n’ayabaye mu 1965, 1993, 2005, 2010 na 2015 kuko ngo yo yaterwaga inkunga n’amahanga.

Yavuze kandi ko kugeza ubu abagerageje guteza ibibazo mu gihugu cye, nibo ngo batumva akamaro k’amatora.

Umuyobozi w’ishyaka rya CNL, Agathon Rwasa, we yavuze ko muri aya matora habayemo ibikorwa byo kuyiba kubera uburyo itumanaho ku mbuga nkoranyambaga ryavanweho mu gihugu.

Kugeza ubu imbuga zahagaritswe mu gihugu zirimo WhatsApp, Facebook, YouTube na Twitter.

Yagize ati "Iki ni ikimenyetso cy’ubujura bwari bwarateganyijwe, turi abatangabuhamya ku byabaye.”

Komisiyo y’amatora mu Burundi, CENI, yo iravuga ko yatangiye gukusanya ibyavuye mu makomine hafi ya yose y’igihugu.

Amakuru ava mu Burundi aravuga ko hari abantu babiri bo muri Butezi ku kigo cy’itora cya Nombe, baburanishijwe n’urukiko bazira gukoresha ibyemezo bitari byo, bategekwa gutanga amande y’amafaranga ibihumbi 50 buri umwe y’Amarundi.

Televiziyo ya leta yatangaje ko hari undi muntu wakatiwe igihano cy’amezi 6 cyangwa ihazabu y’ibihumbi 800, ashinjwa gukomeza ubukangurambaga mu gihe bwari bwarangiye.

Komisiyo y’amatora mu Burundi, yatangaje ko indorerezi 53 zavuye mu mahanga arizo zagiye kugenzura uko aya matora akorwa.

Gusa zabujijwe gukoresha telefoni mu gufata amafoto, ndetse ntabwo zemerewe gukoresha camera mu gihe ziri imbere mu byumba by’amatora.

Imibare y’ibanze y’ibizava mu matora izatangazwa tariki 25 uku kwezi.