CAN 2019: Uganda yisanze mu itsinda ry’urupfu,dore uko n'izindi zatomboranye

Impuzamashyirahamwe y’umupira w’amaguru muri Afurika, CAF yatangaje uko amakipe azahura mu matsinda y’ igikombe cya Afurika kizaba kuva tariki 19 Kamena kugera 19 Nyakanga 2019, ikipe y’igihugu ya Uganda yisanga mu itsinda ryiswe na benshi iry’urupfu ririmo Misiri yakiriye amarushanwa.

CAN 2019: Uganda yisanze mu itsinda ry’urupfu,dore uko n'izindi zatomboranye

Impuzamashyirahamwe y’umupira w’amaguru muri Afurika, CAF yatangaje uko amakipe azahura mu matsinda y’ igikombe cya Afurika kizaba kuva tariki 19 Kamena kugera 19 Nyakanga 2019, ikipe y’igihugu ya Uganda yisanga mu itsinda ryiswe na benshi iry’urupfu ririmo Misiri yakiriye amarushanwa.

Mu ijoro ryo kuri uyu wa Gatanu tariki 12 Mata 2019 nibwo abakunzi b’umupira w’amaguru bamenye uko amatsinda y’igikombe cya Afurika cya mbere kigiye kwitabirwa n’amakipe  24 ahagaze.

Tombola yabereye mu Mujyi wa Giza mu marembo y’uduce nyaburanga twa Misiri turimo imisozi ya ‘Pyramid’, yitabirwa na perezida wa CAF Ahmed Ahmed, na minisitire w’intebe wa Misiri Mostafa Boubaly, iyoborwa n’abatandukanye bazwi mu mupira w’amaguru muri Afurika barimo na Yaya Touré Gnégnéri wafashije Côte d’Ivoire kwegukana iki gikombe mu 2015.

Nyuma ya Tombola itsinda benshi bise iry’urupfu ni itsinda rya mbere ririmo ikipe y’igihugu ya Misiri yakiriye amarushanwa yisanze izahangana n’abaturanyi b’u Rwanda babiri.

Umukinnyi w’umwaka muri Afurika Mohamed Salah na bagenzi be bazaba bahangana na Repubulika iharanira Demokarasi ya Congo n’ikipe y’igihugu ya Uganda yitabiriye igikombe cya Afurika inshuro ebyiri zikurikiranya na Zimbabwe.

Ikipe y’igihugu y’u Burundi yo yisanze mu itsinda rya kabiri ririmo benshi bemeza ko ishobora no kwitwaramo neza kuko ihanganiyemo na Nigeria, Guinée-Conakry yasezereye u Rwanda mu mikino yo gushaka itike na Madagascar. Ni itsinda ririmo amakipe abiri yitabiriye irushanwa ku nshuro ya mbere, u Burundi na Madagascar.

Irindi tsinda rifite imikino izarebwa na benshi mu karere ka Afurika y’u Burasirazuba ni irya gatatu ryahuje abaturanyi bo mu Burasirazuba bw’u Rwanda, Tanzania na Kenya. Harambee Stars na Taifa Stars zigomba guhangana n’ikipe y’igihugu ya Senegal ya Sadio Mane wa Liverpool FC na Algeria ya Riyad Mahrez.

Gusa ku rundi ruhande hari benshi barimo na Yaya Toure bemeza ko itsinda ry’urupfu kandi rizaryohera abakunzi b’umupira w’amaguru ari irya kane ririmo amakipe atatu ashobora no guhanganira igikombe; Maroc, Côte d’Ivoire, na Afurika y’epfo, azaba ari kumwe na Namibia.

Andi makipe ahabwa amahirwe yo kwegukana iri rushanwa harimo; Misiri ifite igikombe cya Afurika inshuro zirindwi (1957, 1959, 1986, 1998, 2006, 2008 na 2010), Cameroun ifite ibikombe bitanu harimo n’igiheruka (1984, 1988, 2000, 2002  na 2017), Ghana igifite inshuro enye (1963, 1965, 1978 na 1982), na Nigeria igifite inshuro eshatu (1980 1994 na 2013)

Uko amakipe yatomboranye mu matsinda

  • Itsinda ‘A’:  Misiri, RD Congo, Uganda, na Zimbabwe
  • Itsinda ‘B’:  Nigeria, Guinée-Conakry, Madagascar, n’u Burundi
  • Itsinda ‘C’Senegal, Algeria, Kenya, na Tanzania
  • Itsinda ‘D’: Maroc, Côte d’Ivoire, Afurika y’epfo, na Namibia
  • Itsinda ‘E’: Tunisia, Mali, Mauritania, na Angola
  • Itsinda ‘F’: Cameroon, Ghana, Benin, na Guinea Bissau

Tombola yabereye mu mujyi wa Giza mu Misiri

Tombola yabereye mu mujyi wa Giza mu Misiri

Ibirori byabereye mu marembo y’uduce nyaburanga twa Misiri turimo imisozi ya ‘Pyramid’

Ibirori byabereye mu marembo y’uduce nyaburanga twa Misiri turimo imisozi ya ‘Pyramid’

Yaya Touré Gnégnéri wafashije Côte d'Ivoire kwegukana iki gikombe mu 2015 ari mu bayoboye Tombola

Yaya Touré Gnégnéri wafashije Côte d’Ivoire kwegukana iki gikombe mu 2015 ari mu bayoboye Tombola

Umunyarwanda Celestin Musabyimana uri mu bayobozi ba CAF ari mu bitabiriye ibi birori

Umunyarwanda Celestin Musabyimana uri mu bayobozi ba CAF ari mu bitabiriye ibi birori

Nyuma y'imyaka myinshi bahangana muri CECAFA, Tanzania na Kenya zisanze mu itsinda rimwe

Nyuma y’imyaka myinshi bahangana muri CECAFA, Tanzania na Kenya zisanze mu itsinda rimwe