Chameleone arashaka kuyobora Umujyi wa Kampala

Chameleone arashaka kuyobora Umujyi wa Kampala

Umuhanzi wo muri Uganda, Joseph Mayanja, uzwi nka Chameleone arashaka kwiyamamariza kuyobora Umujyi wa Kampala mu matora ateganyijwe mu 2021.

Chameleone ni umwe mu bahanzi bo muri Uganda bakoze indirimbo nyinshi zakunzwe kandi zabahesheje ubutunzi n’icyubahiro.

Ikinyamakuru Chimpreports cyanditse ko uyu mugabo wakoranye indirimbo yitwa Agatako n’Umunyarwanda DJ Pius yaba ashaka kwiyongera ku rutonde rw’abahanzi binjiye muri politiki, barimo Bobi Wine uri mu Nteko Ishinga Amategeko y’icyo gihugu.

Amakuru aturuka mu nshuti ze za hafi, aremeza ko uyu Chameleone ashaka kuziyamamaza ku mwanya w’Umuyobozi w’Umujyi wa Kampala mu matora azaba mu 2021.

Mu mwaka ushize yari yatangaje ko atari muri politiki ndetse adateze no kuyinjiramo.

Ukwiyamamaza kwa Chameloene kuje nyuma y’aho abarimo umuraperi Navio bagaragaje ubushake bwo kuba abadepite ba Uganda.

Muri Afurika y’Uburasirazuba, abahanzi bo mu bihugu bimwe na bimwe bari kugenda binjira muri politiki buhororo. Joseph Haule uzwi nka Professor Jay ni umudepite uhagarariye Intara ya Mikumi muri Tanzania, Charles Njagua Kanyi uzwi nka Jaguar nawe ni Umudepite muri Kenya.

Umuhanzi w’Umunyarwanda Safi Madiba nawe yigeze gutangaza ko afite umugambi wo kwiyamamariza kuba umudepite.