Coronavirus ku wa 7 Gicurasi: Abanyamerika 2 528 bapfuye Trump ateguza ibihano bikomeye u Bushinwa

Coronavirus ku wa 7 Gicurasi: Abanyamerika 2 528 bapfuye Trump ateguza ibihano bikomeye u Bushinwa

Leta Zunze Ubumwe za Amerika zongeye kugira umubare w’abantu benshi bishwe na Coronavirus, kuko kuri uyu wa 6 Gicurasi igihugu cyapfushije abantu 2 528.

Ibi byatumye abamaze gupfa muri iki gihugu bagera ku bihumbi 74 807, naho abandi 1 263 197 bamaze kwandura.

Perezida Donald Trump yatangaje ko uburyo Coronavirus yicamo burenze kure ibitero bagabweho n’Abayapani mu 1941, ndetse n’ibyo bagabweho n’umutwe wa Al Qaeda mu 2001, anaboneraho kuvuga ko barimo gushaka ibihano bafatira u Bushinwa.

U Buyapani bwagabye igitero i Pearl Harbor kuwa 7 Ukuboza 1941, abasirikare b’Abanyamerika barenga ibihumbi bibiri barapfa, naho ibyo mu 2001 byagabwe n’ibyihebe byo mu mutwe w’iterabwoba wa al-Qaeda, bihitana abagera ku 3000.

Trump yagize ati “Twahuye n’igitero gikomeye tutigeze duhura nacyo muri iki gihugu, iki nicyo gitero tutigeze tugira, kirarusha ubukana icyakozwe mu gace ka Pearl Harbor, ndetse n’icyabaye mu 2001, ibi ntibyagombaga kuba iyo biza guhagarikirwa aho byavuye mu Bushinwa.”

Amerika yavuze ko irimo gutegura ibihano bikomeye ku Bushinwa, kuko ngo bwatinze kuvuga ko Isi yibasiwe na Coronavirus.

Ishami ry’Umuryango w’Abibumbye ryita ku buzima, OMS, riravuga ko abantu 3 820 737 bamaze kwandura Coronavirus, 265 094 bamaze gupfa naho 1 303 146 bamaze gukira.

Leta Zunze Ubumwe za Amerika zikomeje kuza imbere mu kugira umubare w’abanduye n’abamaze gupfa, Espagne iza ku mwanya wa kabiri mu banduye kuko ari abantu 253 682, hamaze gupfa 25 857, mu Butaliyani handuye 214 457 hamaze gupfa 29 684, mu Bwongereza handuye 201 101, hamaze gupfa 30 076.

Mu Bufaransa handuye 174 191, hamaze gupfa 25 809. Ku mugabane wa Afurika wose hamaze kugaragara abantu 52 713 banduye Coronavirus, abamaze gupfa basaga 2 015 naho abakize ni 18 286.

Afurika y’Epfo iri imbere mu kugira abafite ubwandu bwinshi kuko ari 7 808, abamaze gupfa barenga 153, ikurikirwa na Misiri ifite abanduye ibihumbi 7 588 naho abapfuye ni 469.

Algeria ni cyo gihugu gifite abamaze gupfa benshi kuri uyu mugabane ni 476 mu gihe abanduye ari 4 997.

Muri Afurika y’Iburasirazuba, igihugu kiza imbere mu bwandu bwinshi ubu ni Kenya kuko hamaze kwandura 582 hapfuye 26, Tanzania iraza ku mwanya wa kabiri handuye 480 hapfuye 16, u Rwanda rufite abanduye 268 abamaze gukira ni 130, muri Uganda ho hamaze kwandura 100, mu Burundi handuye abantu 15 hapfa umwe naho muri Sudani y’Epfo hamaze kwandura abantu 58.