Dore Imvano y’itabwa muri yombi rya Umuhoza Jacqueline ukekwaho ubutasi bufite aho buhuriye na Uganda

Dore Imvano y’itabwa muri yombi rya Umuhoza Jacqueline ukekwaho ubutasi bufite aho buhuriye na Uganda

Ibibazo byo kurebana ay’ingwe hagati y’u Rwanda na Uganda bikomeje gufata indi ntera. Iki gihugu cy’igituranyi cyahindutse indiri y’abashaka guhungabanya umutekano w’u Rwanda, ku buryo abayobozi b’inzego za guverinoma n’iza gisirikare muri kiriya gihugu basigaye bakorana bisesuye na buri wese uri muri uwo mugambi.

Ibi bibazo byatangiye mu buryo bweruye mu 2017 ubwo Umunyarwanda wa mbere Rutagungira René yatabwaga muri yombi akuwe mu kabari aho yasangiraga n’inshuti ze, agatwarwa n’inzego za gisirikare muri iki gihugu. Magingo aya aracyafunze nyuma yo gukorerwa iyicarubozo rikaze ryamusize ari igisenzegeri.

Byarakomeje abandi Banyarwanda benshi batangira gufatwa, kugeza n’aho muri iki gihe Uganda yimakaje imikoranire n’imitwe igamije guteza umutekano muke mu Rwanda irimo RNC na FDLR kimwe n’abandi bose baba bafite iyi gahunda.

Mu ijoro rishyira kuri uyu wa Kane, Urwego rw’Igihugu rw’Ubugenzacyaha, RIB, rwatangaje ko rwataye muri yombi uwitwa Umuhoza Jacqueline uzwi nka ‘Jacky’, akurikiranyweho ibyaha by’ubutasi n’ubugambanyi.

Ntihigeze hatangazwa amakuru yimbitse ku itabwa muri yombi ry’uyu mugore kuko uru rwego rwavuze ko bikiri mu iperereza.

Gusa amakuru yizewe agera kuri IGIHE ni uko impamvu z’itabwa muri yombi zifitanye isano n’imigambi ya Uganda n’abambari bayo yo guhungabanya umutekano w’u Rwanda.

Uyu ni umukobwa wa Pasiteri Deo Nyirigira ufite urusengero ruri i Mbarara muri Uganda rwitwa Agape. Uyu mupasiteri aherutse gutorerwa kuyobora “Intara ya Uganda” ya Komite Nyobozi ya RNC, mu matora yabaye tariki 12-13 Ugushyingo 2019.

Agape ni urusengero rwavuzwe kenshi mu guhuza abashaka kugirira nabi u Rwanda, kuko mu gihe bimenyerewe ko izindi nsengero aba ari ingoro zera zihuza abantu n’Imana, rwo rukorerwamo imirimo yo guhuza ibikorwa by’Umutwe w’Iterabwoba wa RNC.

Uru rusengero ni hamwe mu hantu RNC ikorera ibikorwa byayo ishize amanga muri Uganda ishakisha abayoboke bayifasha mu mugambi wo guhungabanya umutekano w’u Rwanda, byose bigakorwa bihagarikiwe na Brig. Gen. Abel Kandiho uyobora Urwego rw’Ubutasi mu Ngabo za Uganda, CMI.

Amakuru yizewe avuga ko muri uru rusengero atari ho honyine habera ibikorwa by’ubukangurambaga ku bajya muri RNC, ahubwo ko hameze nk’icyicaro gikuru cy’ibikorwa byose bya RNC muri Uganda y’Iburengerazuba.

Abayoboke ba RNC bakunze guhurira muri uru rusengero bikitwa ko bagiye mu masengesho, hanyuma bagakora amalisiti y’urubyiruko rw’Abanyarwanda bagiye kwinjiza muri uyu mugambi hamwe n’andi y’Abanyarwanda b’inzirakarengane babona ko babangamira ibikorwa bya RNC.

Umwe mu basengera muri uru rusengero yavuze ko abo Banyarwanda bagaragazwa nk’ababangamira icengezamatwara rya RNC ndetse inshuro nyinshi bahimbwa ko ari intasi za Guverinoma y’u Rwanda, bikageza ubwo bafatwa na CMI bagafungwa ndetse bagakorerwa iyicarubozo.

Kimwe mu bikorwa byibukwa kuri uyu mugabo ni ubwo mu Ukuboza 2017 yafashije itsinda ry’impunzi z’Abanyarwanda zashakaga kwambuka zijya muri Congo mu mitwe yitwaje intwaro, zigafatwa zigeze ku mupaka wa Tanzania, aho zagombaga gukomereza mu Burundi zikabona kwinjira mu mashyamba ya RDC.

Pasiteri Nyirigira uyobora iyi Ntara ya Uganda muri RNC yahunze ubutabera bw’u Rwanda mu 2000 nyuma y’aho bamwe mu bayoboke ba AGAPE Church i Kigali bamenyesheje ubuyobozi ko abaka ku ngufu amafaranga ndetse ko akoresha itorero mu nyungu ze.

Ibirego bisa n’ibi byanatanzwe n’abayoboke b’Itorero Agape i Mbarara ariko biba iby’ubusa kuko bivugwa ko inshuti ze zikora muri CMI zamufashije kubisisibiranya.

Inkuru y'IGIHE