Dore Inkomoko y’ubwandu bukabije bwa Covid-19 bwagaragaye muri Kasho y’i Ngoma

Dore Inkomoko y’ubwandu bukabije bwa Covid-19 bwagaragaye muri Kasho y’i Ngoma
Umuyobozi w’ikigo cy’u Rwanda gishinzwe ubuzima (RBC), Dr Nsanzimana Sabin, yasobanuye ko bagisesengura amakuru kugira ngo hamenyekane inkomoko y’ubwandu bukabije bwa Covid-19 bwagaragaye muri Kasho ya Ngoma, gusa avuga ko mu by’ibanze bamaze kumenya ari uko bushobora kuba bufitanye isano n’urujya n’uruza rwambukiranya imipaka.

Imibare Minisiteri y’Ubuzima yaraye isohoye igaragaza ubwandu bushya bwabonetse ku wa mbere tariki ya 29 Kamena, yerekana ko mu gihugu hagaragaye abantu bashya 101 banduye Covid-19, umubare w’abamaze kwandura mu gihugu ugera kuri 1,001.

Minisante yagaragaje ko mu banduye harimo 22 babonetse mu mujyi wa Kigali, batanu babonetse mu turere twa Rubavu na Rusizi, umwe w’i Kayonza, umwe w’i Kirehe na 72 bafungiye muri kasho y’i Ngoma.

Umuyobozi wa RBC aganira n’Ikigo cy’Igihugu cy’Itangazamakuru (RBA), yasobanuye ko hataramenyekana neza inkomoko y’ubwandu bwagaragaye muri iriya kasho, gusa ahamya ko amakuru y’ibanze yerekana ko bufitanye isano n’urujya n’uruza rwambukiranya imipaka.

Ati: "Itsinda ryagaragaye ku munsi w’ejo turacyarikoraho ubusesenguzi bwimbitse ngo turebe aho buriya burwayi bwaba bwaraturutse, ariko iby’ibanze twamaze kubona ni uko bifitanye isano ya hafi na ruriya rujya n’uruza rw’ingendo zambukiranya imipaka ndetse na bariya batwara imodoka zica muri iriya nzira."

Ku bijyanye n’ubwandu bwagaragaye mu mujyi wa Kigali, Dr Nsanzimana yasobanuye ko muri 22 bahagaragaye, 1/2 cyabo bavuye mu midugudu itandatu yo muri Kigali yashyizwe mu kato, abandi bakaba ari abo mu bice bitandukanye by’Umujyi bagiye bahura n’abanduye.

Abajijwe ingamba RBC yahise ifata mu rwego rwo kwirinda ko 72 bagaragaye I Ngoma bakomeza kwanduza bagenzi babo, umuyobozi wa kiriya kigo yasobanuye ko "Ingamba ni ugukomeza gupima abantu benshi bashoboka, bigakomereza n’ahandi henshi hafungiye abantu ndetse no muri za gereza", yongeraho ko iyo gahunda igomba no gukomereza mu bindi bice by’igihugu.

Yavuze kandi ko kuba mu munsi umwe hagaragaye abantu 101 banduye Covid-19 bidasobanuye ko ibintu byacitse, ngo kuko 70% by’ubwandu bushya byabonetse ahantu hamwe, bityo abo byagaragaye ko banduye bakaba batangiye kwitabwaho bataragira abandi bantu bahura na bo

What's Your Reaction?

like
0
dislike
1
love
1
funny
1
angry
0
sad
0
wow
1