Dr. Dre agiye gutandukana n’umugore we bari bamaranye imyaka 24

Dr. Dre agiye gutandukana n’umugore we bari bamaranye imyaka 24

Nicole Young w’imyaka 50 kuri uyu wa Mbere tariki 29 Kamena 2020 yujuje impapuro yaka gatanya. Aba bombi bari bamaranye imyaka 24 kuko barushinze ku wa 25 Gicurasi 1996.

TMZ yatangaje ko Nicole Young yuzuza izi mpapuro za gatanya yavuze ko afite impamvu zitandukanye zitatuma akomeza kubana n’uyu munyabigwi muri Hip Hop.

Dre na Nicole bafitanye abana babiri; umuhungu witwa Truice Young w’imyaka 23 n’umukobwa witwa Truly Young ufite imyaka 19. Kubera ko aba bana ari bakuru nta ndezo uyu mugabo azigera yakwa.

Dr. Dre w’imyaka 55 afite umutungo ubarirwa muri miliyoni $800 nk’uko Forbes yabitangaje. Uyu mugore ngo arashaka ko nyuma yo gutandukana na Dr. Dre azakomeza guhabwa ubufasha mu by’imitungo buvuye mu mitungo ya Dre.

Nicole yari umugore wa mbere wa Sedale Threatt wakinnye muri NBA aza kumuta yisangira Dr. Dre. Uyu mugore mu mategeko ahagarariwe n’umunyamategeko Samantha Sepctor ukunze kuburanira ibyamamare.

Dr. Dre yamamaye cyane mu ndirimbo zirimo ‘Calfornia Love’ yahuriyemo na 2Pac, ‘Still D.R.E’ n’izindi nyinshi.

Niwe washinze inzu ifasha abahanzi ya Aftermath Entertainment izwi cyane ku Isi yose. Dr Dre afite abana batandatu ku bagore batanu batandukanye, harimo abahungu bane n’abakobwa batatu.

Ku myaka 16 nibwo yibarutse umwana we wa mbere yabyaranye na Cassandra Joy Green bigeze gukundana; icyo gihe uyu wari umukunzi we yari afite imyaka 15, Dre ntabwo yigeze agira amahirwe yo guhura n’uyu muhungu we witwa Curtis kugeza agize imyaka 20 nk’uko byagiye bivugwa kenshi.

Mu 1983 yibarutse umukobwa yise La Tanya Danielle Young yabyaranye na Lisa Johnson.