Dr Francis ushinjwa gukubita umukobwa yishingikirije amafaranga yongeye gufungwa

Dr Francis ushinjwa gukubita umukobwa yishingikirije amafaranga yongeye gufungwa

Nyuma yo kurekurwa atanze ingwate, urukiko rwategetse ko Dr Habumugisha Francis wakubise Diane Kamali yongera agafungwa.

Ni nyuma y’ubujurire bw’ubushinjacyaha ku cyemezo urukiko rwa Nyarugenge rwafashe cyo kumurekura ku wa 25 Nzeri, agakurikiranwa ari hanze rushingiye ku kuba abishingizi Dr. Habumugisha yatanze bari bazwi nk’inyangamugayo, kuba atarigeze abangamira iperereza mu mezi abiri yabanjirije itabwa muri yombi rye no kuba icyaha ashinjwa kitatuma afungwa igihe kirenze imyaka itanu, kiramutse kimuhamye.

Urukiko rwahaye umugisha ubujurire bw’ubushinjacyaha mu mwanzuro wasomye kuri uyu wa 8 Ukwakira maze Dr. Habumugisha yongera gutabwa muri yombi, ibyo urubanza rwe na Diane Kamali rukazakurikiranwa afunzwe.

Irekurwa rya Dr. Habumugisha hari abo ryababaje kuko bavugaga ko ikigaragara umunyamafaranga  n’umutunzi adashobora gufungwa; ahubwo atanga ingwate bakamurekura bitandukanye n’utifite,

Ijambo umunyamafaranga ryaturutse ku kirego cya Diane Kamali yatanze mu ntango za Nzei 2019, ubwo yibutsaga Urwego rw’Igihugu rw’Ubugenzacyaha (RIB) ko amaze amezi abiri atanze ikirego cye ariko bakaba atari yagahawe ubutabera.

Diane Kamali yavuze ko yakubitiwe mu ruhame na Dr. Habumugisha, nyiri GoodRich TV, ubwo bari mu nama. Yabazaga niba kuba umuntu ari umunyamafaranga kandi aziranye n’abayobozi byatuma adakurikiranwa n’ubutabera.

Perezida Kagame yavuze ko agiye kwinjira mu kibazo cya Diane nyuma yo kubona ubu butumwa. Ku munzi wakurikiyeho, inkuru yasakaye ivuga ko Dr. Habumugisha yatawe muri yombi hejuru y’ikirego cya Diane.