Ethiopia: Umuhanzi wari ukunzwe cyane Hachalu Hundessa yishwe, biteza imyigaragambyo

Ethiopia: Umuhanzi wari ukunzwe  cyane Hachalu Hundessa yishwe, biteza imyigaragambyo

Hachalu Hundessa, umwe mu bahanzi bakunzwe muri Ethiopia yaraye yishwe arashwe, ibi byatumye mu gitondo uyu munsi kuwa kabiri haba imyigaragambyo mu murwa mukuru Addis Ababa.

Bwana Hundessa, usanzwe ari n'impirimbanyi y'uburenganzira, nyuma yo kuraswa yajyanywe ku bitaro ariko biba iby'ubusa apfa azize ibikomere.

Minisitiri w'intebe Abiy Ahmed yihanganishije umuryango wa Hundessa, avuga ko yari umuhanzi "w'igitangaza".

Hundessa w'imyaka 34 yari impirimbanyi y'ubwisanzure n'uburenganzira bw'abo mu bwoko bwe bw'aba Oromo, mu myigaragambyo yo mu myaka ishize nibwo yamamaye cyane kubera indirimbo ze.

Mu gitondo uyu munsi kuwa kabiri, abantu benshi bavuye mu bice bitandukanye bagana rwagati mu murwa mukuru Addis kwigaragambya bamagana iyicwa ry'uyu muhanzi.

Imyigaragambyo mu murwa mukuru Addis kubera iyicwa rya Hundessa

Imyigaragambyo mu murwa mukuru Addis kubera iyicwa rya Hundessa

Internet yahise ifungwa mu gihugu kuva ibi bitangiye muri iki gitondo nk'uko umunyamakuru wa BBC uriyo abivuga.

Polisi yataye muri yombi abantu benshi bakekwaho kwica Bwana Hundessa.

Ethiopia isanzwe yugarijwe n'amakimbirane n'urugomo bishingiye ku moko y'abatuye iki gihugu.