Etoile de l’Est ngo yiteguye gutsinda amakipe yose yo mu ntara ay'Ikigali yo ngo ntiyakoraho

Etoile de l’Est ngo yiteguye gutsinda amakipe yose yo mu ntara ay'Ikigali yo ngo ntiyakoraho
Umunyamabanga Mukuru wa Etoile de l’Est yo mu Karere ka Ngoma, Byukusenge Elie yatangaje ko iyi kipe ayoboye yiteguye gutsinda amakipe yose yo muri shampiyona y’icyiciro cya mbere, havuyemo atandatu.

Amakipe atari mu yo abona Etoile yatsinda ni: APR FC, Rayon Sports, Kiyovu Sports, Police FC, A.S Kigali n’indi ya gatandatu atavuze.

Mu kiganiro yagiriye kuri Radio Rwanda, Byukusenge yabwiye abanyamakuru ati: “Reka mbabwire, izi kipe z’uturere zose, zo mu ntara muri make, nta kipe ishobora kutuza imbere pe!”

Abajijwe niba Mukura V.S nk’ikipe yo mu Karere ka Huye itatsinda Etoile, Byukusenge yasubije ko itari muri izi 6, abajijwe niba Gicumbi FC itaza kuri uru rutonde, yasubije ko nayo itarimo. Abajijwe niba Musanze FC itazamo, yasubije ati: “Musanze nibura…ni yo mpamvu twasize iya 6.”

Etoile yazamukanye na Gicumbi FC muri shampiyona y’icyiciro cya mbere tariki ya 12 Ukwakira 2021, itsindiye Amagaju kuri penaliti kuko umukino wari warangiye amakipe yaguye miswi ya 1-1.

Iyi kipe yo yiyitiriye uburasirazuba bw’igihugu, yari imaze imyaka 24 igerageza amahirwe yo gukina muri iyi shampiyona ariko buri mwaka bikanga.

like
0
dislike
0
love
0
funny
0
angry
0
sad
0
wow
0