Ferwafa yashyizeho uburyo bushya igikombe cy’Amahoro cy’uyu mwaka kizakinwamo

Ferwafa yashyizeho uburyo bushya igikombe cy’Amahoro cy’uyu mwaka kizakinwamo

Ishyirahamwe ry’Umupira w’Amaguru mu Rwanda, FERWAFA, rivuga ko mu gikombe cy’uyu mwaka hazajya haba tombola y’uburyo amakipe azahura bitandukanye no mu myaka yashize, aho hakorwaga tombola imwe yerekana uburyo amakipe azahura kugeza ku mukino wa nyuma.

Ferwafa yamaze gutumira ubuyobozi bw’amakipe yiyandikishije kugira ngo azitabire igikombe cy’Amahoro cy’uyu mwaka muri tombola izaba ku wa Gatatu w’icyumweru gitaha tariki ya 22 Gicurasi 2019 ku cyicaro cyayo.

Ni ku nshuro ya mbere kuva mu 2015 tombola y’igikombe cy’Amahoro igiye kongera kuba ifunguye ku makipe n’abanyamakuru, aho mu buryo bwari busanzwe, komisiyo ishinzwe amarushanwa yatangazaga uburyo amakipe azahura kuva irushanwa ritangiye kugeza muri ½, abenshi bakavuga ko hari amakipe aharurirwa inzira dore ko byari bigoye kubona APR FC na Rayon Sports hari ahandi zahurira atari ku mukino wa nyuma.

Mu 2017, umutoza wa Bugesera FC, Muhire Hassan, watozaga Rugende FC, yanenze uburyo iri rushanwa rikorwamo kuko nta mahirwe byahaga amakipe yo mu cyiciro cya kabiri kandi yo aba afite abakinnyi batari bato dore ko ikipe zageze kure mu gikombe cy’amahoro zabanzaga guhura n’izasezerewe mbere mu irushanwa ryabanje.

Mu buryo bwa tombola bwari bukunze kugaragara mu gikombe cy’Amahoro, harimo gufata amakipe yo mu cyiciro cya kabiri akabanza agakuranamo, abashije gukomeza agahura n’ayo mu cyiciro mbere akomeye.

Umuyobozi wa Komisiyo ishinzwe amarushanwa muri FERWAFA akaba n’umuvugizi wayo, Bonnie Mugabe, yavuze ko uyu mwaka hazajya haba tombola muri buri cyiciro, amakipe agatomborana hatitawe ku cyiciro cyayo cyangwa uko ahagaze.

Ati "Ku wa Gatatu w’icyumweru gitaha nibwo hazaba tombola, tuzahuriza hamwe amakipe yose uko ari 20 (mu bagabo) atomborane. Amakipe 10 azaba yatsinze kongeraho n’andi atandatu azaba yatsinzwe byoroheje (best loosers), azahura atomborane muri 1/8. Muri buri cyiciro hazajya haba tombola kugeza muri ½.”

Amakipe yiyandikishije, yatumiwe muri tombola y’uyu mwaka izabera ku cyicaro cya FERWAFA ni: Kiyovu Sports, AS Kigali, Rayon Sports , Sunrise FC, Police FC, APR FC, Mukura VS, Bugesera FC, Marines FC, Etincelles FC, Espoir FC, Gicumbi FC, Hope FC, Etoile de l’est FC, Interforce FC, Gasogi Utd, Unity Sports Club, Vision FC, Intare FC na Rwamagana City FC.

Mu cyiciro cy’abagore kizakina igikombe cy’Amahoro ku nshuro ya mbere, iri rushanwa rizitabirwa n’amakipe icyenda: ES Mutunda WFC, Inyemera WFC, Rugende WFC, Bugesera WFC, Kamonyi WFC, AS Kabuye, AS Kigali, Gakenke WFC na Scandinavia WFC.

Amakuru ahari nuko uyu mwaka hazajya haba umukino umwe muri buri cyiciro, amakipe agahurira ku kibuga cyihariye (adasanzwe akiniraho).

Mukura Victory Sports ni yo ifite igikombe giheruka, yegukanye imaze gutsinda Rayon Sports kuri penaliti 3-1 nyuma yo kunganya ubusa ku busa. Iyi kipe y’i Huye, yahagarariye u Rwanda muri CAF Confederation Cup 2018/19, igarukira mu ijonjora rya nyuma rigana mu matsinda.