Gakenke: Umugabo yishe umugore we amutemye, ahita yiyahuza aside urupfu ruramwanga

Gakenke: Umugabo yishe umugore we amutemye, ahita yiyahuza aside urupfu ruramwanga

Umugabo w’imyaka 30 y’amavuko witwa Munyantore JMV ukomoka mu Karere ka Gakenke mu Murenge wa Coko, yishe umugore we witwa Nyiranizeyimana Angelique w’imyaka 27, amutemye nawe yiyahuza aside ariko ntiyapfa.

Ni amakuru yamenyekanye ku mugoroba wo kuri uyu wa 15 Nzeri 2020, nk’uko bivugwa n’abaturage.

Uyu mugabo ngo yasanzwe mu nzira yarembye arimo kuruka amaraso, birukiye mu rugo rwe kumushakira imyenda yo kumwambika kugira ngo bamujyane kwa muganga, basanga asize atemye umugore we yamaze gupfa.

Umunyamabanga Nshingwabikorwa w’Umurenge wa Coko, Ndacyayisenga Patrick, uri mu kiruhuko cy’igihe gito, yavuze ko aya makuru bayamenyeshejwe n’abaturage bababwiye ko byatewe n’amakimbirane bagiranaga ashingiye ku gucana inyuma.

Ati "Ni amakuru twahawe n’abaturage ko uyu mugabo yishe umugore we amutemye igikanu, bitewe n’amakimbirane. Umugabo yakekaga ko umugore we amuca inyuma, umugabo yahise anywa imiti ashaka kwiyahura, kuko n’ubu ntarabasha kuvuga, ari mu bitaro aho ari gukurikiranwa n’abaganga.

Uyu muryango wari umaze igihe gito ushakanye. Umugore asize umwana umwe.