Gicumbi: Bakoze ubukwe bwatashywe n’abantu 15 babikomoye kuri filimi

Gicumbi: Bakoze ubukwe bwatashywe n’abantu 15 babikomoye kuri filimi

Mutabazi Cédric na Gahonzire Rachel b’imyaka 25 y’amavuko batuye mu Mujyi wa Kigali ariko bubatse mu Karere ka Rwamagana, bakoze ubukwe bwatashywe n’abantu 15 nyuma y’igitekerezo bakuye muri filimi yitwa Marina.

Kuri uyu wa Kane tariki ya 21 Werurwe 2019, nibwo Mutabazi n’umugore we basezeranye imbere y’amategeko mu Murenge wa Kageyo barangije basaba umuyobozi w’umurenge ko yabaha uburenganzira bakambikana impeta, nabyo bahita babikorera aho nta mihango y’idini ibaye.

Uyu mugabo yavuze ko we n’umugore bari batumiye abantu 30, ariko kubera impamvu z’akazi kuri bamwe, 15 aribo babashije kwitabira.

Mutabazi yavuze ko ajya gutegura ubu bukwe, yabikuye ku gitekerezo yabonye muri filimi yitwa Marina aho abantu bategura ubukwe bagahitamo gutumira abantu bake.

Impamvu nyamukuru yari ukuba yakora ubukwe kandi bukagenda neza budatwaye amafaranga menshi ndetse butanasabye kwaka intwererano.

Ati “Nabikoze mu buryo bwo kuba nakoresha ubushobozi bwanjye ntasabye ku ruhande cyangwa ngo mbwire runaka. Nakoze ibintu bitabangamira umuntu ku buryo umubwira ugasanga bibaye nk’itegeko.”

Kwiyakira byabereye ahitwa Ubwuzu Bar aho kurya no kunywa kuri buri wese witabiriye ngo yari yisanzuye hanyuma burangiye ba nyir’akabari bamubwira ko agomba kwishyura ibihumbi 126 Frw make ku bihumbi 200 Frw yari yitwaje.

Mutabazi yavuze ko ajya gutegura ubu bukwe, atigeze yandika impapuro z’ubutumire ahubwo ko yamenyeshaga uwo yifuza ko yazabwitabira, ibintu ahamya ko bidasanzwe mu mitegurire y’ubukwe mu Rwanda.

Ati “ Ugereranyije n’ubundi bukwe bw’abanyarwanda cyangwa abandi banyamahanga hamwe n’ibyo tubona muri za filimi, njye narebeye kuri filimi bita Marina. Harimo ubukwe bw’abantu batandukanye ariko ugasanga abantu batumiwe ntabwo bagera no ku ijana kandi ari abantu ubona bafite amafaranga arengeje n’ay’abanyarwanda.”

Ubu bukwe ngo bukwiye kubera urugero rwiza urubyiruko rw’u Rwanda ku buryo rwajya rukoresha amafaranga rufite bitabaye ngombwa gusaba inkunga.

Ati “Urubyiruko rukwiye kwiyumvamo ko rugomba gukora ubukwe rukoresheje ubushobozi rufite kandi ubushobozi bwawe ntibwaba buke. Hari n’undi muntu nigeze kumva muri Kenya wakoresheje ubukwe bw’idolari rimwe. Uwakoresheje ubukwe bw’idolari ntaho ataniye n’uwakoresheje ubwa miliyoni icumi, bose ikizima ni uko baciye mu mategeko.”

Abajijwe niba nta bantu bamutwerereye yasubije ati “Nta bantu bantwerereye, nta nubwo nigeze ntwereza.”

Mutabazi muri iyi minsi nta kazi kuko yahoze acururiza imwe muri sosiyete itanga serivisi z’itumanaho mu gihe umugore ari umukozi muri hotel.

Mutabazi na Gahonzire bambikaniye impeta mu murenge

Bahise bajya kwifotoza mu busitani bwo ku murenge mbere yo gukomereza mu kabari kwiyakira

Ubu bukwe bwitabiriwe n'abantu 15 mu gihe hari hatumiwe 30

Kwitakira byabereye mu kabari mu Mujyi wa Gicumbi aho Mutabazi yishyuye ibihumbi 126 Frw