Gisagara: Bafite ubwoba bw’inzoga banywa bakeka ko zishyirwamo ’Ifumbire mvaruganda

Gisagara: Bafite ubwoba bw’inzoga banywa bakeka ko zishyirwamo ’Ifumbire mvaruganda

Abaturage bo mu karere ka Gisagara, Intara y’Amajyepfo bavuga ko bahangayikishijwe n’ubuzima bwabo kubera inzoga bita iz’Ibikwangari banywa zashyizwemo isukari n’ibindi bakeka ko byabamo ivumbire mvaruganda.

Aba baturage bo mu Murenge wa Mamba muri aka Karere, bavuga ko izi nzoga zifite amazina atandukanye, Igikwangari, Tsura ingutiya, Nindunyuzaha n’andi menshi. Ngo zibatera uburwayi ndetse zikanakurura urugomo.

Umwe mu baturage, ati "Izi nzoga ntizujuje ubuziranenge rwose kuko abazikora bakoresha ibintu bishobora kwangiza ubuzima, dore ko mu gitoki kimwe bashobora kuvanamo amajerekani 10. Bivuze ko bifashisha ibindi bintu birimo Isukari, pakimaya ndetse ngo hari n’abashyiramo ifumbire mvaruganda iyi twita ire.”

Uwitwa Sibomana wo mu kagari ka Kabumbwe, avuga izi nzoga bazinywa kubera ko zihendutse kandi n’icupa ryayo riba ari rinini. Ati "Iyo uguze ibicupa 2 uba uguze inzoga nyinshi kurusha uwanyoye Cungumuntu [Ikorwa n’uruganda rwa Gisagara] Ebyiri. Urebye uba unyoye nka Cungumuntu Enye, ayo mafaranga rero ntiwayabona, bigatuma twihitiramo kwinywera igikwangari.”

Umuyobozi w’Umurenge wa Mamba, Cyambari Jean Pierre, na we yivugira ko inzoga z’inkorano ziteje ikibazo muri aka gace ariko na none ko bifitanye isano n’imyumvire ikiri hasi y’abaturage.

Ati "Mu murenge wacu n’ibyo koko hari imyumvire iri hasi bituma abaturage bacu bihitiramo kwinywera izo nzoga z’inkorano batitaye ku buzima bwabo, babinywa rero bikabatera indwara nka Diabette, imivuduko y’amaraso n’ibindi. Birinde ziriya nzoga n’ubwo zigura make bwose zica ubuzima kandi ntakiruta ubuzima bwacu.”

Nk’uko Rwandatribune kibitangaza, akomeza avuga ko nk’ubuyobozi bw’umurenge wa Mamba bakomeje ubukangurambaga kugirango abaturage bamenye ko amagara aseseka ntayorwe.