Gufungura Diane Rwigara na Ingabire, bimwe mu byahaye u Rwanda amanota muri raporo y’amahoro ku Isi

Gufungura Diane Rwigara na Ingabire, bimwe mu byahaye u Rwanda amanota muri raporo y’amahoro ku Isi

U Rwanda rwazamutseho imyanya 24 kuri Raporo igaragaza uko ibijyanye n’amahoro bihagaze ku Isi, Global Peace Index.

Kimwe mu byazamuye amanota y’u Rwanda bigaragara muri iyo raporo ni intambwe mu gufungura urubuga rwa politiki, hafungurwa abanyapolitiki nka Diane Rwigara na Ingabire Victoire.

Global Peace Index ni raporo igaragaza uko amahoro n’umutekano bihagaze mu bihugu 163 bitandukanye hirya no hino ku Isi. Iyasohotse muri uku kwezi igaragaza uko ibijyanye n’amahoro byari bihagaze mu mwaka ushize wa 2018.

Zimwe mu ngingo zirebwaho muri iyo raporo harimo uko umutekano w’abaturage uhagaze mu gihugu, urwego rw’amakimbirane ari imbere mu gihugu no hanze yacyo n’uburyo inzego z’umutekano ziteguye guhangana n’icyahungabanya umutekano n’amahoro.

Iyo raporo ivuga ko ari ubwa mbere u Rwanda rugize amanota meza cyane guhera mu 2009.

Mu ngingo zirebwaho zose u Rwanda rwateye intambwe ishimishije, cyane cyane mu kubaka inzego z’umutekano ziteguriye guhangana n’icyahungabanya amahoro.

Ikindi ni ukuba ibyaha byaragabanyutse by’umwihariko mu Mujyi wa Kigali, nabyo byongereye amanota.

Imiryango mpuzamahanga ikunze kunenga u Rwanda ko runiga urubuga rwa politiki ariko iyi raporo yo ivuga ko hari intambwe imaze guterwa.

Babishingira ku igirwa umwere rya Diane Rwigara ndetse n’imbabazi zahawe Ingabire Victoire bombi barekuwe umwaka ushize.

Kuba nta makimbirane imbere mu gihugu nabyo byongereye amanota y’u Rwanda ku kigero cya 18.5 %. Iyo raporo igaragaza ko mu myaka 20 ishize, mu Rwanda hagaragaye amakimbirane arimo imitwe yitwaje intwaro inshuro ebyiri gusa.

Iyi raporo kandi yashimye uburyo u Rwanda ruri mu bihugu bya mbere ku Isi bifite ingabo nyinshi mu bikorwa byo kugarura amahoro hirya no hino ku Isi.

Mu bihugu byo muri Afurika u Rwanda ruri ku mwanya wa 17, nyuma y’ibindi bihugu nk’Ibirwa bya Maurice biri ku mwanya wa mbere, bikaba ku mwanya wa 24 ku rwego rw’Isi, Botswana iri ku mwanya wa kabiri muri Afurika, ikaza ku mwanya wa 30 ku rwego rw’Isi, mu gihe Ghana iza ku mwanya wa gatatu muri Afurika ikaza ku mwanya wa 40 ku rwego rw’Isi.

Mu Karere u Rwanda ruherereyemo, Tanzania niyo iza imbere ku mwanya wa karindwi muri Afurika, ikaza ku mwanya wa 54 muri Afurika.

Igihugu cya mbere ku Isi ni Iceland, igakurikirwa na Nouvelle Zélande,hakaza Portugal. Leta Zunze Ubumwe za Amerika iza ku mwanya wa 128.

Ibihugu bya nyuma birimo ibibazo by’amahoro ku Isi harimo Sudani y’Epfo, Syria na Afghanistan.

Urutonde rugaragaza uko ibihugu bihagaze