Gusiragizwa bashaka ibyangombwa by’ubutaka bibangamiye abatuye umujyi wa Kigali

Gusiragizwa bashaka ibyangombwa by’ubutaka bibangamiye abatuye umujyi wa Kigali

Bamwe mu batuye umujyi wa Kigali bavuga ko basiragizwa bashaka ibyangombwa by’ubutaka birimo kubuhererekanya bishingiye ku bugure, umurage, gutanga imisoro myinshi y’ibirarane yabwo,... Ibi ngo bikaba biterwa na serivisi mbi bahabwa n’ubuyobozi bw’inzego z’ibanze.

Bamwe bavuga ko badepoza ibyangombwa bakaba bamara nk’amezi atatu batarasubizwa, ibi bakavuga ko bibagusha mu gihombo rimwe na rimwe bagacibwa amande y’ubukererwe mu gusorera ubutaka kandi impamvu ari serivisi mbi bahabwa.

Uyu muturage ati "Mbese imitangire ya serivisi ntabwo igenda neza, bituma tudakora kuko duhora tugenda ku Karere tujya kubishaka cyangwa ku Murenge".

Undi aragira ati "Hari igihe umuntu adepoza ibyangombwa by’ubutaka bigatinda, nk’ubu njyewe hari ibyo nadepoje bikaba bimaze ukwezi nkumva rero birimo kundindiza, biratudindiza kuko nk’ubu ejo naje aha, uyu munsi nagarutse, abana ntibafite ubitaho kandi nanjye sinabashije kwikorera, biratubangamiye ibyiza ni uko bakwihutisha serivisi....".

Ikigo cy’igihugi gishinzwe imicungire n’imikoreshereze y’ubutaka, kivuga ko serivisi zitanogeye aba baturage bavuga ziterwa n’akazi kenshi inzego z’ibanze zibishinzwe ziba zifite cyangwa n’uburiganya bikunze kugaragara ku baturage muri ibi byangombwa birebana n’ubutaka.

Umuyobozi mukuru w’iki Kigo, Mukamana Esperence yagize ati " Ubu dufite politiki nshya y’ubutaka, itegeko ry’ubutaka naryo turimo turarivugurura mu gihe gito rizaba ryasohotse, n’igishushanyo mbonera k’igihugu kirimo kiravugururwa kizarangira umwaka utaha, n’icy’umujyi wa Kigali. Ibyo byose amategeko arimo kubinoza neza".

Yakomeje agira inama abagura ubutaka kuzajya babanza gushishozi ngo kuko harimo amanyanga menshi, cyangwa se bagakoresha umubare 651 bakareba niba nta makimbirane aburimo cyangwa se kuba bwaratanzwe mu ngwate ya banki.

Umuyobozi w’Umujyi wa Kigali, Pudence Rubingisa avuga ko bagiye gukosora iyo mitangire mibi ya serivisi z’ubutaka mu nzego z’ibanze.

Ati "Ibibazo mu Karere n’imirenge bahora bakemura umunsi ku wundi nka 80% ni ibirebana n’ubutaka, imbogamizi nyinshi zigaragara ko hakirimo amakimbirane mu miryango, turabakangurira ko bagomba gufatanya n’ubuyobozi agakemuka, ariko natwe twisuzumye dusanga hari ibyo tugomba gukemura, kuko hari dosiye ziza zikamara iminsi kandi zitakagombye kurenza iminsi irindwi".

Ikigo cy’igihugi gishinzwe imicungire n’imikoreshereze y’ubutaka gitangaza ko abaturage basaga miliyoni zirindwi aribo bamaze guhabwa ibyangombwa by’ubutaka, kigasaba abagura n’abagurisha kubanza gusuzuma icyo ubwo butaka bwagenewe cyangwa se niba butaratanzweho ingwate mu bigo by’imari.